BLACKPINK ‘Jump’ No.1-ah zuang kai nghal

BLACKPINK ‘Jump’ No.1-ah zuang kai nghal
BLACKPINK hla thar ‘Jump’ chu Billboard Global 200 chart No.1-ah a debut a, he chart-a an hla No.1 kai thei pathumna a ni. Hetihrual hian Justin Bieber ‘Daisies’ pawh No.3 atangin bul a rawn tan a, HUNTRIX ‘How It’s Done’ chu top 10 a kai ta bawk.
Billboard Global 200 chart hi kar khat chhunga khawvel huapa hla lar dan tehna niin, chart ranking siam nan hian ram hrang hrang 200 chuanga official-only stream (subscription leh ad-supported audio leh video music services) leh download sales te chu tehna pawimawh a ni.
BLACKPINK ‘Jump’ hian kar khat chhungin stream maktaduai 100 leh sales 14,000 tlingin, No.1-ah a debut a, BLACKPINK hla he chart No.1 ni thei pathumna niin, October 2022 khan an hla ‘Shut Down’ chu No.1 kaiin, hemi kum vêk September thlaah ‘Pink Venom’ chu kar hnih an No.1 pui tawh bawk. An group member ROSE pawhin soloist angin Bruno Mars a thawhpuina ‘APT.’ chu kar 12 chhung he chart-ah hian a lo No.1 pui tawh a, March 2021 khan ‘On the Ground’ a No.1 pui tawh bawk. BLACKPINK member dang Jennie leh LISA te pawhin he chart-a top 10 kai thei hla pahnih ve ve nei tawhin, Jisoo-i’n pakhat a nei tawh a, ‘Jump’ hi group anga an hla he chart top 10-a lang thei pangana a ni bawk.
KPop Demon Hunters soundtrack, HUNTRIX “Golden”-in stream maktaduai 82.2 leh sales 7,000 nei lehin No.1 atangin No.2-ah a tawlh a, HUNTRIX hla dang ‘How It’s Done’-in stream maktaduai 42.1 leh sales 3,000 neiin, No.11 atangin No.9 a kai ve ta bawk.
Justin Bieber ‘Daisies’-in stream maktaduai 63.6 leh sales 6,000 neiin, No.3-ah a debut a, he chart top 10-a JB hla lang thei pariatna a ni.
Chart No.1 hlui Alex Warren ‘Ordinary’ chu No.2 atangin No.4-ah a tawlh a, KPop Demon Hunters soundtrack May & Saja Boys “Your Idol” chu No.3 atangin No.5-ah a tawlh ta bawk.
Billboard Global 200
Top 10:
1 Jump – BLACKPINK
2 Golden – HUNTR/X: EJAE, Audrey Nuna & REI AMI
3 Daisies – Justin Bieber
4 Ordinary – Alex Warren
5 Your Idol – Saja Boys: Andrew Choi, Neckwav, Danny Chung, Kevin Woo & samUIL Lee
6 Soda Pop – Saja Boys: Andrew Choi, Neckwav, Danny Chung, Kevin Woo & samUIL Lee
7 Die With A Smile – Lady Gaga & Bruno Mars
8 APT. – ROSE & Bruno Mars
9 How It’s Done – HUNTR/X: EJAE, Audrey Nuna & REI AMI
10 Back To Friends – sombr