Blinken an China vau

US Secretary of State Antony Blinken chuan China in Ukraine beih nana Russia hnena ralthuam a pek zui zel chuan Washington in hma a la ang, tiin a sawi.
US top diplomat chuan tunhnaia Beijing a tlawhnaah Chna thuneitute hnenah chiang taka a hrilh thu sawiin Ukraine run mek chu Cold War hnua European security tana thil hlauhawm ber a ni a ti.
Blinken chuan engti angin nge US chuan chet a lak dawn erawh a sawi lo a. Chutihrual chuan Beijing nena inlaichinnaah thil thenkhatah hmasawnna a awm tih a sawi thung.
Beijing chu fentanyl drugs in US a luh tawh loh nana a hmalaknaah a fak bawk a. China hi US a fentanyl thawnluttu ber niin he damdawi hian US ah harsatna a thlen nasa a ni.
Blinken chuan beijing chuan Middle East ah ‘constructive’ role a kalpui thei tibawkin China chuan Iran nena an inlaichinna tha chu Israel nena buaina nasa a thlen zui zel loh nan a hmang thei a ti bawk a.
Washington leh Beijing inlaichinna chu Taiwan leh South China Sea chungchang leh US in China hnena advanced tech thawnluh a khap avangin a chhe hle a. Nikum February thlaa spy balloon avangin a chhe zual bawk.
Tun hnai lawkah US chuan dan thar siam hialin Chinese-owned TikTok chu hralh emaw a nih loh chuan US ah tihtawp tur a ti bawk a. TikTok chu American tena an hman nasat em em niin mahse American data te chu China ram chhungah dahthat niin US in a ngai a, chuvangin hralh ngei turin a phutlui ta a ni.
Blinken hian China a tlawhnaah President Xi Jinping nen pawh inhmu in, Xi hian nikum November thlaa US Presidnet Joe Biden nena inbiak hnuah thawhona lamah hmasawnna a awm tiin a sawi a.
Ram pahnih chu inhmelma lova thawhdun tur zawk an ni, tia sawiin US in China development lamah a tha zawnga a thlir a nih chuan inlaichinna chu ngelnghetin a tha anga, hmalam panin a kal zel ang, a ti.
Blinken chuan inlaichinna tha an neih zel theih nana pawimawh chu, China-in Russia in munition a siambelh zelna tur hmanrua a pek zuiloh a ni a ti bawk a. China chuan Russia hnenah ‘machine tools, micro-electronics leh optics’ te a pe tiin a sawi.
“Chu’ng hmanrua hmang chuan Russia in Ukraine a beihna nasa zawkin a chuhnzawm zel theih phah a. Chutak chu Europe tana hlauhawm a ni” tiin Blinken chuan a sawi bawk a. ‘Cold War hnua Europe security tana hlauhawm ber thleng mek chu a tizualkai a ni’ a ti bawk.
“Hemi chungchang hi China thuneitute hnenah chiang takin kan hrilh tawh a. China in hma a la chhunzawm lo a nih chuan hma kan la zui ang” tiin Blinken chuan a sawi hmak bawk.