Block inthlan enin MNF boruak a tha – Dr R Lalthangliana

Tunhnaia hmun hrang hranga MNF Block inthlan meka an thathnem thin dan leh phur dan enin, sawrkar zo ta lo mah se, an party boruak erawh a tha chho hle tih a lan thu MNF senior vice president Dr R Lalthangliana chuan a sawi.
Zirtawpnia Khawzawla MNF office-a Tuichang Block huamchhunga hruaitu thar leh hruaitu hluite nen an inkawmnaah Dr R Lalthangliana chuan, sawrkarna an chang zo ta lo na a, an boruak erawh Block hrang hrang inthlan mek enin a tha chho hle tih a sawi a. Sub-Hqrs pawh inthlan tura ruahman mek a ni tih a sawi.
AMC by-election neih zawh takah chhiatna hrang hrang thleng vanga vote a tlak that loh thu leh vote tla chhe lutuk chu pawi a tih thu a sawi rualin, Lawngtlai lam by-election ah erawh MNF-in hnehna an chang tih a sawi a. VC inthlan chu a hnuk pawimawh tak a nih avangin chak ngei tura tan la turin kalkhawmte a fuih. Kumin September 24-a Khawzawl Dinthar leh Chawngtlai VC by-election neih turah chakna chang ngei tura tan lak theuh a ngai tih a sawi a ni.
Enchhin dawl lo sawrkar kan hrawn mek tih MNF senior vice president hian a sawi a. Kum khat em pawh an sawrkar hmain ZPM sawrkar chu a hniam zawngin a kal zel a, sawrkar leh tur chu MNF bak an awm chuang lo tih a sawi.
Khawzawl chu MNF sawrkarin district thar a pek niin, hmasawnna hmachhawp hrang hrang awm tura MNF sawrkarin fuke kim tura ruahmanna a kalpui dan mipuiin enzui turin a ngen tih a sawi. A bikin mipui tana chhenfakawm tak tur, hospital changtlung tak neih theihnana MNF sawrkarin ruahmanna thui tak a kalpui tawh chu chhunzawm a ni em, tih enzui turin a chah.