Boeing fuel control switch endik vek turin airline-te ti

Boeing fuel control switch endik vek turin airline-te ti
June thlaa Air India thlawhna tla chhuina tihchhuah tawh china fuel control switch off vang nia tar lan a nih hnuah India-a thlawhna viltu chuan a ram chhunga airline-te chu an Boeing thlawhtheihnaa he khawl hi endik vek turin a ti a, hei hi .
Directorate General of Civil Aviation (DGCA) chuan Thawhtanni khan thupek tichhuakin Indian leh ram dang airline zawng zawng pawh anmahnia lo inendik vek turin a ti a ni.
Thlawhna tlak chhan chhuina tihchhuah hnu lawkah erawh US Federal Aviation Administration chuan Thawhtanni khan Boeing thlawhtheihnaa fuel control switch-te hi a him tha tawk vek tih a sawi ve thung.
Air India thlawhna tla chhuina hmasa tihchhuahah khan an thlawh chhuah hnu lawkah khan a khawlpuia tuialhthei pek luhna ber switch chu a in-off nia a lan thu tar lan a ni.
London pan Flight 171, Boeing 787 Dreamliner tla kha kum 10 dawn chhunga thlawhna tlaa thi tam ber tum zingah a tel.
Inrinnia a chhuina hmasa tihchhuah a nih hnu atangin India leh ram pawna mi leh pawl hrang hrangin an ngaihdan leh an hmuh dan an sawi zui nasa hle.
DGCA chuan switch hi July 21 hmaa endik vek turin airline-te chu a ti a, ‘thlawhnaa zin leh thlawh a him zawk nan a hun bi tiam hi khauh taka kenkawh a ni ang’ tih an sawi tel.
Kum 2018 khan US-a thlawhna thuneitu, Federal Aviation Administration (FAA) pawhin kaihhruaina a siamah Boeing thlawhna neitu (operator)-te chu fuel cut-off switch tihpalh thilah a che sawnin a in-off thei em tih endik hmasa turin a lo ti tawh a, hei hi tih ngei ngei turin a ti lo thung.
Thlawhna tla chhuitute chuan Air India khan tih ngei tur a nih loh avangin an endik lem lo niin an report-ah an tar lang nghe nghe.
DGCA chuan airline-te chu switch endika report pe leh theuh turin a ti nghal.
Hetih lai hian Indian airline khalhtu pawl chuan thlawhna tla ta khalhtute an tan tih an sawi a. Indian Commercial Pilots’ Association chuan thlawhnaa thawkte kha ‘chona lian tak hmachhawn thei tura inzir leh mawhphurhna la an ni a, pilot-te hi rin dan avanga dem ngawt tur a ni lo’ tih an sawi.
India Aircraft Accident Investigation Branch (AAIB)-in thlawhna tlak chhan an chhui tawh chin an tihchhuahah Flight 171-a a khawlpuia tuialhtheu lut thununtu switch chu off niin a khawlpuiin hna a thawh zui theih loh phah niin an sawi.
Cockpit voice recording an endiknaah a khalhtu pakhat zawkin, ‘Engati nge i off?’ tia a zawt lai leh pakhatin, ‘Ka off lo reng reng’ tia a chhang lai ri pawh hriat theih a ni.
Report siamah hian hei hi an tlak chhan ber a ni tihna a ni a la nih loh thu an sawi.
Reuters news agency chuan Thawhtanni khan South Korea-a airline zawng zawng chu an Boeing thlawhnaa fuel switch endik vek turin an ti tih a tar lang bawk.