Boruak a dai deuh, mahse a ngui
Manipur-a Zo hnahthlakte boruak a dai deuh a, mahse a dai tawh tia sawi tur chu a ni lo. Kar hmasa lam aiin a dai deuh tih chauh a ni. An boruak hi a dai deuh a, mahse an boruak hi a ngui an ti.
Jiribam district-a an volunteer 10, kar hmasaa CRPF te’n an kahhlum chungchangin titi a luah a, Lamka khawpuiah chuan mipui titi ber a la ni tih thu dawn a ni.
Thu dawn danin, Thawhlehni hian kuang nena kawngzawh huaihawt an rilruk a, volunteer-te’n buatsaih an tum.
Zo hnahthlak chi peng hrang hrangin pawl an nei a, chung pawl hrang hrang hnuaiah chuan defence lam an awm. Defence lam hian volunteer an nei a, mahni khua leh ram ven hna an thawk. CRPF kah hlumte kha volunteer an ni a, chuvangin kuang nena kawngzawh huaihawt rawttute pawh hi chi peng hrang hranga defence lam tangrual an ni. Mahse a huaihawta tak hi chu chi peng hrang hranga zirlai pawlte an ni ang.
Thawhtanni khan kawngzawh huaihawt tumin an inbe kual a, kuang lem kengin kil hrang hrang atangin an kal khawm ang a, intawhkhawmna hmun atanga a huhova kawng hi zawh an rilruk tih thu dawn a ni.
Mi 10-te ruang hi Lamka-a District Hospital-ah an dah a, Inrinni khan post mortem tihna Silchar atangin Lamka hi phurh thlen a ni. Damdawi in kawtah hian mipui an awm reng a, zanah pawh an tlaivarpui thin.
Post mortem report hi an la hmu lo a, chuvang chuan ruang hi an in theuhvah luhpui lovin damdawi inah hian an dah rih. Post mortem report an hmuh hma chu damdawi ina dah hi an tum a, chumi chhunga tlaivarpui tur chuan khaw hrang hrang a indawtin an inruat a ni.
An hruaitute chuan mi 10 zinga parukte hi kah hlum, mi dang pali chu sawisak hlum nia an hriat thu an sawi.
Thawhtanni tuk khan Assam Rifles hotute leh Zo hnahthlak chi peng hrang hrang hruaitute Lamka-ah an inkawm a, post mortem report hmuh thuai an duh thu leh CRPF an duh loh thu te an thlen.
An hruaitute sawi danin, Meitei nena an inkar boruak a daih deuh a, Meitei nena inkah bur bur leh lian thama inbeih a awm zui rih lo. Mahse inring rengin an awm a, Meitei nena inhnaih khuaah phei chuan ngawrh takin an duty reng.
Meitei lam hi an buai a, mipuiin sorkar an bei mek. Zo hnahthlak lam chuan an hemi buaina tihreh nan hian Meitei hian Zo hnahthlakte an bei thut thei tih te, Meitei mipuiin an sorkar hotute lakah an duh ang an hmuh loh chuan Zo hnahthlakte an bei thut thei titein an chhut a, inring renga awm a tul thu an sawi.