Boruak alhthei put titawp turin a khirh lai ber thawk zo
Boruak alhthei put titawp turin a khirh lai ber thawk zo
Sivasagar district, Assam-a ONGC tuialhthei thlitfim loh khur atanga boruakalhthei put chu Nilaini kha a ni 14-na a ni ta a, company hian a thunun tura tih harsa leh khirh ber chu ‘an hlen tawh’ niin an sawi.
Ni tin boruakalhthei put dinhmun an puanzar thinah ONGC hian titawp tura hna an thawh mekah hma an sawn tih an sawi a. “Rim leh thawhhona tha tak hnuaiah extra-long boom crane leh tonne 40-a rit crane tangrual chuan rig-a derrick atangin tubing stand 42 an tisawn thei a, rig tawp atanga a ko thlen theihna kawng an titlang a ni,” an ti.
Bhatiapar-a Barichuk hmuna Rudrasagar oil field-a Rig No SKP 135-a Well No RDS 147A atang hian June 12 atang khan boruakalhthei hi a put tan a. Mi mal firm, SK Petro Services chuan sorkar enkawl, Maharatna company hnuaia hna an thawh mekna a ni.
ONGC chuan an tih leh tur chu Blowout Preventer thiah darh hnua a chhinna tur siam a ni tih an sawi.
“Hna thawh chhung hian boruakalhthei put hi a tam hret palh thei a. ONGC chuan hengte hi hlauhawm loh niin a tlem hret hret a, a hnaih metre 500 chin piah lam tan chuan engmah hlauhawm a ni lo tih a chiang a ni,” tiin an sawi.
Company hian khur atanga boruakalhthei put tihtawp leh tihtlem tumin a bei ngar ngar tih an sawi.
Tui hmang pawhin nasa taka beih a ni tih an sawi a. Tui hi Dikhow lui atangin lak luh reng a ni a, hetih lai hian tui lian zelah veivahna a tibuai deuh thung.
Boruak a him leh him loh pawh en reng a ni a, damdawi thiamten an vil a, a bul hnai atanga insawn chhuakte awmna, relief camp-ah pawh a awmten hardatna an tawh loh nan ngaihtuah an ni bawk.
Boruakalhthei a putna hmun hi US atanga thawk chhuak hetiang lam buaipui leh a thiam bik mi pathumin an thleng tawh a, thawktute an pui mek.
Kar hmasa khan Assam Chief Minister Himanta Biswa Sarma chuan Union Petroleum & Natural Gas Minister Hardeep S Puri hnenah chak zawka hna thawk tura ONGC nawr turin a ngen a. An chet lak danah a bul hnaia chengte duhkhawp a tling lo tih a thlen bawk.
Boruakalhthei put avang hian a chhehvela chengte an buai hle a, chhungkaw 330 chuang sawn chhuah niin Banggoan bulah an awmna tur siamsak an ni a, an ni tin mamawh pek niin himna tur ngaihtuahsak zel an ni.
Assam sorkar chuan a tuartu chhungkaw 350 chuang hnenah chhawmdawlna hmasa atan Rs. 25,000 theuh a pe tawh.