Boruak tha lo hip avangin mi 12 thi

Boruak tha lo hip avangin mi 12 thi
Georgia rama ski resort pakhatah carbon monoxide an hip avangin mi 12 an thi niin police te chuan an sawi.
He thil thlenna hmun hi Georgia rama ski resort lian leh sang ber Gudauri-a restarant pakhat chhungah a ni a, an mutthilha laia thleng nia rin a ni.
Thite hi ramdang mi 11 leh Georgian pakhat an ni a, police te chuan an enfiahna atangin tharum thawhna leh tih luihnaa thil thleng ni lovin, boruak tha lo hip luh palh vang liau liau anih thu an sawi.
An chhuichianna atanga a lan danin zirtawpni liamta atang khan he lai building a electric hi a that loh avangin oil hmanga siam generator an hmang tawh niin an sawi a, hei hian a rei hnuah boruak tha lo a thlen zui phah ta ni bera a lan thu an sawi bawk.
Nunna chante hi an hming leh nihna an la puangzar rih lo a, chhui chian nghal a nih thu thuneitute chuan an sawi.
Gudauri hi Caucasas tlanga Mtskheta-Mtianeti biala awm niin, tuipui zawl atanga 2200m (7200ft) vela sanga awm a ni a, Georgia khawpui Tbilisi atanga hmar lam 120km (75 miles) vela hla a ni.