Boruak ti bawlhhlawh lo zawnga hun pui hmang turin Larsap-in ngen

Mizoram larsap Dr Hari Babu Kambhampati chuan Krismas leh kumthar lo thleng tur pualin Mizoram mipui duhsakna hlanin, Mizoram boruak thianghlim ti bawlhhlawh lo zawnga lawm za turin mipui a ngen tih a sawi. Mizoramah Krismas chu Mizo hnam ziarang leh kalphung nena inrem takin ropui leh nung taka lawm thin a ni, tiin, Krismas vuakveta khawtlang mipui tha taka kan inphuarkhawm thin leh mahni tawng ngeia Krismas hla kan sa chuan hnam ziarang a tarlang tel tih a sawi. Krismas hun chhunga induhsakna lantirnana thilpek kan inhlan thin chuan kan thilphalna a pholang a, baihvai leh dawmkan ngaite puala kan luangchhuak thin chu a entawntlak hle tih a sawi a ni.
Tunhnai maiah Aizawl khawpui chu India ram khawpui zinga boruak thianghlim bera puan a ni tih sawiin, “Kan tu leh fate tana chenna tlak khawvel siam tura lungrual taka sawrkar hmalakna tha taka kan tawiawm thin hi he dinhmun kan thlen theih chhan leh khawpui dangte entawn ber kan nih chhan a tih theih. Boruak thianghlim kan neih theihna tura hmalakna hi hun pui lo thleng turah pawh vawng nung tlat a, boruak tibawlhlawh lo zawnga Krismas leh kumthar lawm za turin Mizoram mipui ka ngen a ni,” a ti.
Tunhma lam zawnga dan leh thupek tha taka zawm chunga hunpui hman a lo ni tawh thin chu chhuanawm a ti tih thu larsap hian a sawi a. Kuminah pawh chhunzawm leh ngei tum turin mi tin a chah.
Mahni chhungte kianga hun pui hmang ve thei lo tur midangte tana rawngbawl hna thawk mek – sipai, hriselna lama thawktute leh a dang mi engemawzat an awm thu sawiin, heng mite hian mahni aiin midang an dah pawimawh hmasa a, Krismas awmzia leh nihna chiang takin an tarlang a, an ngaihsanawm takzet tih a sawi a ni.
Prime minister kaihhruaina hnuaiah India chuan kum 2047-ah ram changkang leh intodelh ‘Vikshit Bharat’ nih tumin tan a la mek tih pawh sawiin, “He dinhmun thleng tur hian Mizoram pawhin mawhphurhna pawimawh tak a nei. India ram hmasawnna tur ruangam duanah Mizoram a tel ve a tul a. Hemi atan hian India sawrkar policy leh programme ngaihven thin tur leh a hlawhtlin theihnan phur taka tawiawm turin mitin ka sawm a ni,” a ti.
Kumthar lo thleng tur chuan muanna, hmasawnna leh hlawhtlinna Mizo mipuiah thlen se. Krismas leh kumthar hun nuam tak hmang theuh turin duhsakna sang ber a hlan tih Dr Hari Babu Kambhampati hian a sawi bawk.