Boruakalhthei put tuarte Rs. 25,000 theuh pe dawn

Boruakalhthei put tuarte Rs. 25,000 theuh pe dawn
Assam sorkar chuan Sivasagar district-a ONGC tuialhthei thlitfim loh khur atanga boruakalhthei inphuh chhuakin a tihbuai chhungkaw 350-te chu puihna Rs. 25,000 theuh pek an nih tur thu a puang a, inphuh chhuak hian ni ruk a tling ta bawk.
Chief Minister Himanta Biswa Sarma-a chuan puihna pek tur a puan ruah hian Petroleum Minister Hardeep Singh Puri-a chuan Thawhlehni vek khan Delhi-ah hotu liante thutkhawmpuiin an sawiho va, state leh sorkar laipui chu an thil tawn mekah an indawr zel tih a sawi.
June 12 atang khan ONGC Rudrasagar oil field, Bhatiapar, Barichuk-a Rig No. SKP 135-a Well No. RDS 147 atang hian boruakalhthei a inphuh chhuak tan a. Mi mal firm, SK Petro Services chuan he khurah hian sorkar hnuaia Maharatna company kaltlangin hna an thawk mek a ni.
Sarma hian Thawhtanni tlai khan a tuartute chu a kan kual a, “Camp-ah hrehawm ti takin chhungkaw 350 vel an awm mek a. Zangnadawmna chungchang ngaihtuah a ni a. A hmasa atan Chief Minister’s Relief Fund atangin Rs. 25,000 theuh pek an ni phawt ang,” a ti.
Puri-a’n a pisaa thutkhawm a kohvah hian video conference hmangin Guwahati atangin a tel ve tih Sarma chuan a sawi bawk.
Sarma chuan chief secretary-in ONGC chairman biain company hotu lawkte pawhin Sivasagar hi an tlawh dawn tih a sawi.
“ONGC chuan US atanga mi thiam bikten an tlawh tawh thu leh a put hi an tihtawp thuai an inbeisei a. Chief secretary hian union petroleum secretary pawh be tawhin thil kalpui dan tur pawh an sawi dun a ni,” a ti.
Chief minister chuan zangnadawmna pek tur buaipui a nih thu leh tuna an ngaih pawimawh ber chu boruakalhthei put tihtawp a ni tih a sawi.
“A tul a nih chuan state sorkarin suma puihna hi a pe zel ang a, kei pawhin ka tlawh zel ang,” a ti.
Hetih lai hian pawl pakhat, Bir Lachit Sena member-te chu Thawhlehni khan Sivasagar-a SK Petro Services pisaah an pungkhawm a, a tuartute zangnadawmna pek an phut.
“ONGC hian zangnadawmna an pe dawn a, he firm hian an kut an sil thei bik lo vang,” tiin an hruaitu, Srinkhal Chaliha chuan a sawi.
ONGC chuan Thawhtanni khan boruakalhthei put thunun tur hian tawnhriat nei tha mi thiam bik awmna crisis management team an thutchilhtir thu a puang.
District thuneitute chuan boruak bawlhhlawh dan a la nasa lo tih sawiin tual chhung Pollution Control Board, Assam pisain a vil reng tih an sawi.