Boss thar hnuaia England squad hmasaber thlir ang
England manager a nih hnua Thomas Tuchel-a squad hmasaber puan takah Aston Villa forward Marcus Rashford pawh ram tana khel tura kohkir leh a ni.
Three Lions tana Rashford khelh hnuhnunber chu March 2024 friendly-a Brazil an infiampui kha niin, kumin January thlaah Manchester United chu loan-a chhuahsanin Villa lamah a kal a, goal la khung chiah lo mah se assist vawili nei tawhin, squad-ah hmuh tur a awm zui leh ta phawt.
Kum 27-a upa Rashford hian England tan game 60 a khelh tawh atangin goal riat a thun tling ve tawh mah se Manchester United lama hmun a chan phak loh hnu khan England manager kal chhuak ta Gareth Southgate pawhin national team-ah a hnawl zui ta mai a, tunah national team-ah koh a ni zui leh ta a ni.
Newcastle defender Dan Burn leh Arsenal player Myles Lewis-Skelly-te chu ram tana debut nghakchhuak thei dinhmunah dingin, tun kha England squad-a an koh vawikhatna a ni.
England hian 2026 World Cup qualifying campaign an tan chho dawn a, tunthla hian Wembley khelmualah match hnih khelh tur an nei a, a hmasa zawk chu March ni 21, Zirtawpnia Albania an mikhual tur niin, March ni 24, Thawhtannia Latvia nen an insu zui leh ang.
England head coach Tuchel chuan a 26-man squad-ah senior player langsar zinga mi Ajax midfielder Jordan Henderson a telh bawk.
Kum 34 mi ni ve tawh Henderson hian English FA lamin non-English manager an rawih hnuhnunber Fabio Capello hnuaiah khan a senior debut nghakchhuakin, chu chu kum 2010 kha a ni a, national team tana a khelh hnuhnunber chu November 2023-a Malta an hmachhawn kha a ni thung.
Burnley goalkeeper James Trafford leh Liverpool defender Jarell Quansah-te pawh koh zingah telin, senior team tana an inlan vawikhatna tur an nghak dun mek.
Tottenham striker Dominic Solanke pawh hliam avanga thla hnih zet a chawlh hnuin Pathianni khan khelmualah a kirleh thei ta a, Bournemouth nen 2-2-a an inhnehtawk tumin a khel tluan a, England squad tharah hmuh tur a awm zui ta bawk.
-- Advertisement --
England squad
Goalkeepers: Dean Henderson (Crystal Palace), Jordan Pickford (Everton), Aaron Ramsdale (Southampton), James Trafford (Burnley)
Defenders: Dan Burn (Newcastle United), Levi Colwill (Chelsea), Marc Guehi (Crystal Palace), Reece James (Chelsea), Ezri Konsa (Aston Villa), Myles Lewis-Skelly (Arsenal), Tino Livramento (Newcastle United), Jarell Quansah (Liverpool), Kyle Walker (AC Milan, loan from Manchester City)
Midfielders: Jude Bellingham (Real Madrid), Eberechi Eze (Crystal Palace), Jordan Henderson (Ajax), Curtis Jones (Liverpool), Cole Palmer (Chelsea), Declan Rice (Arsenal), Morgan Rogers (Aston Villa)
Forwards: Jarrod Bowen (West Ham United), Phil Foden (Manchester City), Anthony Gordon (Newcastle United), Harry Kane (Bayern Munich), Marcus Rashford (Aston Villa, loan from Manchester United), Dominic Solanke (Tottenham Hotspur)