Box office-ah Beyonce ‘Renaissance’ a No.1

Box office-ah Beyonce ‘Renaissance’ a No.1
Beyonce concert film ‘Renaissance: A Film by Beyonce’ chuan tun weekend kalta khan North America-ah cinema hall ticket hralhna atangin dollar maktaduai 21 lalutin box office No.1 a ni. He film hi Beyonce kutchhuak niin, writer, executive producer leh co-director a ni kawp a, North America-ah cinema hall 2,536-ah tihchhuah a ni.
‘Renaissance’ hian US pawn lam, ram hrang hrang 94-ah dollar maktaduai 6.4 a lalut bawk a, tihian opening weekend-a a lakluh zawng zawng chu dollar maktaduai 27.5 a ni. He concert movie ticket leitu 70% aia tam mah chu hmeichhia an ni a, 52% chu mihang niin, ticket leitu 70% dawn chu kum 18 leh 34 inkar an ni bawk.
Renaissance: A Film by Beyonce-ah hian Beyonce-i’n ‘Renaissance World Tour’ a neihna hrang hrang bakah behind-the-scene footage te dah tel a ni.
The Hunger Games: The Ballad of Songbirds & Snakes in an tlangzarh atanga weekend vawi thumnaah dollar maktaduai 14.5 lalut lehin No.2 a ni a, he film hian kar thum chhungin US-ah dollar maktaduai 121.2 lalut tawhin, US pawnah dollar maktaduai 122.7 a lalut tawh bawk a, a vaiin dollar maktaduai 243.9 a lalut tling tawh a ni.
Japanese film ‘Godzilla Minus One’ rin aiin a che tha a, dollar maktaduai 11 lalutin No.3 a ni. He film hi mipa lamin an en nasa a, ticket leitu 77% chu mipa niin, 63% chu kum 18 leh 34 inkar an ni bawk.
Trolls Band Together-in dollar maktaduai 7.6 lalut lehin No.4 a ni a, he film hian kar thum chhungin US-ah dollar maktaduai 74.8 a lalut tling ta a, US pawn lama a lakluh nen chuan dollar maktaduai 160.6 a lalut tling tawh.
‘Wish’-in dollar maktaduai 7.4 lalut lehin No.5 a ni a, he film pawh hian US-ah dollar maktaduai 42 a lalut tling tawh a, US pawna a lakluh nen chuan dollar maktaduai 81.6 a lalut tling tawh bawk.
‘Napoleon’ pawhin dollar maktaduai 7.1 lalut lehin No.6 a ni a, tihian US-a a lakluh zawng zawng chu dollar maktaduai 45.7 a tling tawh a, US pawna a lakluh nen chuan dollar maktaduai 136.6 a lalut tling ta bawk.
Bollywood film ‘Animal’-in dollar maktaduai 6.1 lalutin No.7 a ni. He film hi cinema hall 700-ah chauh tihchhuah a ni. US pawnah a che tha hle a, ram hrang hrang 37-ah dollar maktaduai 36.1 lalut bawkin, a vaiin dollar maktaduai 42.2 a lalut thei a ni.
Film tlangzarh thar bawk sci-fi faith-based film ‘The Shift’-in dollar maktaduai 4.2 lalutin No.8 a ni a, John Woo film action-thriller ‘Silent Night’-in dollar maktaduai 3 lalutin No.9 a ni bawk.