Box office-ah Civil War a la No.1
Tun weekend kalta khan Hollywood-a film tlangzarh thar awm neuh neuh mah se Alex Garland-a dystopian political action film ‘Civil War’ chu North American box office No.1 a la ni a, he film hian tun weekend kalta khan North America-ah cinema hall ticket hralhna atangin dollar maktaduai 11 a la lut leh thei a, hei hi a No.1 pui leh ta a ni. Civi War hian ni 10 chhungin North America-ah cinema hall ticket hralhna atangin dollar maktaduai 45 a la lut tling ta.
Vampre film tlangzarh thar ‘Abigail’-in beisei a pha chiah lo a, opening weekend-ah dollar maktaduai 10.2 lalutin No.2-ah a debut. He film hi marketing tel loin, production-ah ringawt dollar maktaduai 28 vel an seng a, opening weekend-a a sum lak luh hi chuti takin tam lo mah se a tha tawk viau tho mai. Abigail hian US pawnah, ram hrang hrang 62 atangin dollar maktaduai 5 a lalut thei bawk a, tihian a vaiin dollar maktaduai 15.2 a lalut ve ta nghal a ni.
He film hi horror movie lama tawnhriat nei nual tawh Matt Bettinelli-Olpin leh Tyler Gillett te siam a ni a, anni hi Scream franchise reboot leh horror movie hit zet mai ‘Ready or Not’ te pawh lo siam tawh an ni. An film thawnthu chu, misual rualin misual hotupa fanu, kum 12 an kidnap a, mahse, an buai takna chu an hmeichhe naupang ruk bo chu vampire a lo ni tlat!
Godzilla x Kong: The New Empire pawhin a weekend li-naah dollar maktaduai 9.8 lalut lehin No.3 a la ni a, he film hian US-ah kar li chhungin dollar maktaduai 170 a lalut tling tawh a, US pawna a lakluh nen chuan maktaduai 485.2 a tlin der tawh. US tih lohah chuan China chu a sum hmuhna lian niin, dollar maktaduai 119 a lalut thei a ni.
Guy Ritchie film siam thar ‘The Ministry of Ungentlemanly Warfare’ pawhin maktaduai 9 lalutin No.4-ah a debut. He film hi Superman film atanga kan hmelhriat tawh Henry Cavill channa a ni a, World War II laia Nazi U-boat tichhe tura che chhuak te chanchin tarlanna a ni.
Japanese anime ‘Spy x Family Code’-i’n dollar maktaduai 4.9 lalutin No.4 a ni a, Kung Fu Panda 4 pawhin weekend vawi li-naah dollar maktaduai 4.6 lalut lehin No.5 a la ni bawk. Kung Fu Panda 4 hian US-ah dollar maktaduai 179.4 lalut tling tawhin, US pawna a lakluh nen chuan maktaduai 480.3 a tlin ve ta bawk.
Box office-ah Civil War a la No.1
Get real time updates directly on you device, subscribe now.