Box office-ah Deadpool & Wolverine a No.1
Deadpool & Wolverine chuan an tlangzarh atanga weekend vawi hnihnaah North America-ah cinema hall ticket hralhna atangin dollar maktaduai 97 a la lut leh thei a, box office No.1 niin, Nort America-ah film tlangzarh tawhah weekend vawi hnihnaa sum lak luh tamah pariatna a ni pha a, Marvel film-ah chuan a pangana a ni pha bawk.
He film hian an tlangzarh atanga ni 10 chhungin US-ah cinema hall ticket hralhna atangin dollar maktaduai 395.6 a la lut tling tawh a, US pawnah dollar maktaduai 428.5 la lut tawh bawkin, a vaiin dollar maktaduai 824.1 a tlin der tawh a, tuna a kal dan en chuan reiloteah dollar tluklehdingawn a la lut thei dawn niin an chhut.
Deadpool film hmasa berin US-ah dollar maktaduai 363.1 la lut theiin, khawvel huapin dollar maktaduai 782.6 a la lut thei bawk a, a film pahnihnain US-ah dollar maktaduai 318.5 leh khawvel huapin dollar maktaduai 734.5 a la lut thei a, tuna Deadpool film thar hian kar hnih chhung lekin a rawn khum nghal ve ve.
Deadpool & Wolverine film hi ‘R’ rated niin, tunah hian R-rated film tlangzarh tawh zingah sum la lut tam pathumna a ni der tawh a, R-rated film zinga sum la lut hnem ber record siam mek chu ‘Joker’ kha niin, dollar tluklehdingawn 1.064 a la lut thei a, a pahnihna chu ‘Oppenheimer’ niin, dollar maktaduai 975.2 a la lut thei bawk.
July thla laihawla film tlangzarh, box office No.1 pawh lo ni tawh Twisters-in a weekend vawi thumnaah dollar maktaduai 22.7 la lut lehin No.2 a la ni a, he film pawh hian US-ah dollar maktaduai 195.6 a la lut tling ta bawk.
M Night Shyamalan film siam thar, Josh Harnett channa ‘Trap’-in dollar maktaduai 15.6 la lutin No.3-ah a debut ve bawk.
Despicable Me 4 pawhin dollar maktaduai 11.3 la lut lehin No.4 a la ni a, he film pawh hian US-ah dollar maktaduai 300 la lut tling tawhin, khawvel huapin dollar maktaduai 752.2 a la lut tawh a, animated film dang ‘Inside Out 2’-in dollar maktaduai 6.7 la lut lehin No.5 a la ni a, he film hian khawvel huapin dollar tluklehdingawn 1.55 a la lut tling tawh a, animated film tlangzarh tawh zinga sum la lut hnem ber a la ni.
Box office top 10:
1 Deadpool & Wolverine $97,000,000
2 Twisters $22,650,000
3 Trap $15,600,000
4 Despicable Me 4 $11,250,000
5 Inside Out 2 $6,700,000
6 Harold and the Purple Crayon $6,000,000
7 Longlegs $4,140,000
8 The Firing Squad $1,600,000
9 A Quiet Place: Day One $1,400,000
10 Bad Boys: Ride or Die $600,000