Animated movie ‘Despicable Me 4’ chuan tun weekend kalta khan cinema hall ticket hralhna atangin dollar maktaduai 75 la lutin, North American box office No.1 a ni. Kar kalta, July ni 4 kha American Independence Day niin, weekend-in a chhunzawm a, chawlh a rei deuh a, he film pawh hi July ni 3-ah an tlangzarh a, weekend hma, ni hnih chhunga a sum lak luh nen, ni nga chhungin US-ah dollar maktaduai 122.6 a la lut hman a, US pawnah pawh dollar maktaduai 230 a la lut nghal bawk.
Despicable Me hi animated franchise-ah chuan sum la lut hnem ber a la ni a, a film hmasa ber ‘Despicable Me’-in 2010 khan opening weekend-ah dollar maktaduai 56 la lutin,, 2013-ah a film panihna ‘Despicable Me 2’-in July 4 opening weekend-ah dollar maktaduai 143 la lutin, 2017-ah a film pathumin, July 4 weekend-ah tho dollar maktaduai 120 a la lut thei bawk.
Animated movie dang, kar kalta North American box office No.1 ‘Inside Out 2’-in tun weekend kalta khan dollar maktaduai 30 la lut lehin, No.2-ah a tawlh ta a, he film hian kar li chhungin US-ah dollar maktaduai 533.8 a la lut tling tawh a, North America-a animated movie sum la lut tam pathumna a ni pha tawh a, khawvel huap chuan dollar tluklehdingawn 1.217 la lut tling tawhin, khawvela animated movie sum la lut tam pangana a ni tawh bawk.
‘A Quiet Place: Day One’-in dollar maktaduai 21 la lut lehin No.3 a la ni a, he film pawh hian ni 10 chhungin Nort America-ah dollar maktaduai 94.4 a la lut tling ve tawh bawk.
Film tlangzarh thar ‘MaXXXine’-in dollar maktaduai 6.7 la lutin, No.4 a ni a, he horror movie hi Mia Goth channa a ni.
Bad Boys: Ride or Die pawhin dollar maktaduai 6.6 la lut lehin No.5 a la ni a, he film pawh hian kar nga chhungin North America-ah dollar maktaduai 177.4 a la lut tling ta.
Kavin Costner film siam, dollar maktaduai 100 chuang an senna ‘American Saga – Chapter One’ chu No.6 la ni mah se beisei a pha thei lo a, weekend vawi hnihnaah dollar maktaduai 5.5 la lut lehin, tihian kar hnih chhungin North America-ah dollar maktaduai 22.2 chiah a la lut thei a, hei hian August thlaa an tlangzarh leh tur a film chhunzawmna pawh a nghawng deuh ngeiin a rinawm.
Box office top 10:
1 Despicable Me 4 $75,000,000
2 Inside Out 2 $30,000,000
3 A Quiet Place: Day One $21,000,000
4 MaXXXine $6,705,038
5 Bad Boys: Ride or Die $6,550,000
6 Horizon: An American Saga Chapter 1 $5,480,000
7 Sound of Hope: The Story of Possum Trot $3,219,811
8 Kalki 2898-AD $1,834,000
9 The Bikeriders $1,300,000
10 Kinds of Kindness $860,000
Box office-ah ‘Despicable Me 4’ a No.1
Get real time updates directly on you device, subscribe now.