Box office-ah ‘Dog Man’ a la bauh ring ber

Box office-ah ‘Dog Man’ a la bauh ring ber
Super Bowl weekend a ni bawk a film tlangzarh thar lian tham a awm lem lo a, ‘Dog Man’ pawhin competition lian nei loin box office No.1 a ni leh ta. ‘Dog Man’ hian tun weekend kalta khan US-ah cinema hall ticket hralhna atangin dollar maktaduai 13.7 la lut lehin North American box office-ah a No.1 leh ta a ni.
‘Dog Man’ hian US-ah kar hnih chhungin cinema hall ticket hralhna atangin dollar maktaduai 54.1 a la lut tling tawh a, US pawnah dollar maktaduai 11.9 la lut tawh bawkin, tihian kar hnih chhungin dollar maktaduai 66 a la lut tling ta. He animated film hi dollar maktaduai 40 vel senga siam a ni.
Super Bowl weekend-ah hian film tlangzarh thar hi a tam ngai lo a, kuminah chuan Valentine’s Day theme romantic comedy ‘Heart Eyes’ dollar maktaduai 8.5 la lutin No.2 a ni. He film hi Mason Gooding, Jordana Brewster leh Olivia Holt te channa niin, khawpui hrang hranga inngaizawng te that thin heart shape a hmaituam chet dan vel tarlanna a ni.
Valentine’s Day a hnai leh tawh bawk a romantic film hralh a kal ve leh deuh a, ‘Love Hurts’-in dollar maktaduai 5.8 la lutin, No.3 a ni. He film hi Ke Huy Quan, Daniel Wu leh Ariana DeBose te channa niin, real estate agent pakhat, a tunhma nun tlansan tum vel chanchin tarlanna a ni.
‘Mufasa: The Lion King’-in dollar maktaduai 3.9 la lut lehin No.4 a la ni a, he film hian US-ah kar riat chhungin dollar maktaduai 235.2 la lut tling tawhin, US pawna a lak luh nen chuan dollar maktaduai 671.1 a tlin tawh a, sci-fi horror movie ‘Companion’-in dollar maktaduai 3 la lut lehin No.5 a ni a, he film pawh hian ni 10 chhungin US-ah dollar maktaduai 16 la lut tawh e.
Box office top 10:
1 Dog Man $13,700,000
2 Heart Eyes $8,500,000
3 Love Hurts $5,800,000
4 Mufasa: The Lion King $3,924,000
5 Companion $3,020,000
6 One of Them Days $3,000,000
7 Becoming Led Zeppelin $2,685,000
8 Flight Risk $2,600,000
9 Sonic the Hedgehog 3 $1,750,000
10 Moana 2 $1,544,000