Box office-ah Hunger Games a No.1

Hunger Games: The Ballad of Songbirds and Snakes chuan tun weekend kalta khan North America-ah cinema hall ticket hralhna atangin dollar maktaduai 44 lalutin box office No.1 a ni a, hetihrual hian ‘Trolls Band Together’ pawhin dollar maktaduai 30.6 lalutin No.2 a ni ve thung.
Hunger Games film kan hriat tawh thin hmalama thil thleng tarlanna ‘The Hunger Games: The Ballad of Songbirds and Snakes’ hi Hunger Games film hnuhnung an tichhuah atanga kum riat hnuah an tlangzarh leh chauh a, mahse, cinema hall sum lakluhah a film hmasa lam a pha lo hke. Jennifer Lawrence channa Hunger Games film hmasa pali te khan opening weekend-ah dollar maktaduai 100 an lalut tling vek a, a film pali te hian khawvel huapin dollar tluklehdingawn 2.9 an lalut tling tawh bawk a ni.
A film tharah hian Rachel Zegler leh Tom Blyth te chu a role pawimawh changtu niin, Peter Dinklage, Jason Schwartzman leh Viola Davis te pawh an inlan, US pawnah dollar maktaduai 54.5 lalutin, tihian ram hrang hrang 88 atanga a lakluh chu dollar maktaduai 98.5 a tling.
Trolls Band Together hi Anna Kendrick leh Justin Timberlake gte channa niin, anni hian an role ngai Poppy leh Branch an rawn chang leh a, a film hian US pawnah dollar maktaduai 76.3 lalutin, a vaiin ollar maktaduai 108.1 a lalut nghal a ni.
The Marvel-in beisei a pha lo telh telh a, a weekend vawi hnihnaah dollar maktaduai 10.2 lalut lehin box office No.3 a ni a, US pawnlam, ram hrang hrang 52-ah dollar maktaduai 19.5 a lalut bawk a, tihian kar hnih chhungin khawvel huapin dollar maktaduai 161.3 a lalut tling ve ta a ni.
Box Office Top 10 ($ in million):
1. The Hunger Games: The Ballad of Songbirds & Snakes : $44
2. Trolls Band Together : $31
3. The Marvels : $10
4. Thanksgiving : $10
5. Five Nights at Freddy’s : $3.5
6. The Holdovers : $2.7
7. Next Goal Wins : $2.5
8. Taylor Swift: The Eras Tour : $2.4
9. Priscilla : $2.3M
10. Killers of the Flower Moon : $1.9M