Box office-ah ‘Novocaine’ a chungnung ber
Tun weekend kalta kha US-ah kumina kar tawp cinema hall sum che vel tlember tum a la ni a, COVID-19 hripui kan hmelhriat hnua kar khat cinema hall sum chevel chhiat ber tum a la ni bawk. Chutiang karah chuan ‘Novocaine’-in dollar maktaduai 8.7 la lutin, box office No.1 a ni.
Box office ranking hi US-a chawlhkar tawp (Zirtawpni – Pathianni) chhunga cinema hall ticket hralhna atanga tehin siam thin a ni a, Jack Quaid channa, action comedy ‘Novocaine’ hi action hero pakhat, genetic lam thil avanga na (pain) hre thei lo chanchin tarlanna a ni. Jack Quaid chu bank-a hnathawk Nathan Caine lemah a changin, bank rawktu ten a thawhpui an man tel chhanchhuah tuma a chet dan vel tarlanna a ni.
Kar kalta box office No.1 ‘Mickey 17’-in dollar maktaduai 7.51 la lut lehin No.2-ah a tawlh a, film tlangzarh thar dang ‘Black Bag’-in dollar maktaduai 7.5 la lutin, No.3 a ni ve thung.
Tun weekend kalta khan US-ah cinema hall ticket hralhna atanga dollar maktaduai 10 chin la lut thei film pakhatmah a awm lo va, Hollywood sum chevel pawh tun weekend khan dollar maktaduai 54.7 vel niin an chhut a, hei hi COVID kan hmelhriat hnuah, COVID vanglai, cinema hall an khar lai te tih lohah chuan weekend vawi khata Hollywood sum chevel tlem ber tum a la ni.
Box office No.1 hlui ‘Captain America: Brave New World’-in dollar maktaduai 5.47 la lut lehin No.4 a la ni a, he film hian US-ah dollar maktaduai 190 a la lut tling tawh.
Film tlangzarh thar The Day the Earth Blew Up: A Looney Tunes Movie-in dollar maktaduai 3.17 la lutin No.5 a ni a, film thar dang, Kristian sakhaw rinna kaihhnawih ‘The Last Supper’-in dollar maktaduai 2.77 la lutin No.6 a ni bawk.
Box office top 10:
1 Novocaine $8,700,000
2 Mickey 17 $7,510,000
3 Black Bag $7,500,000
4 Captain America: Brave New World $5,479,000
5 The Day the Earth Blew Up: A Looney Tunes Movie $3,170,000
6 The Last Supper $2,825,000
7 Paddington in Peru $2,775,000
8 Dog Man $2,500,000
9 The Monkey $2,465,000
10 Last Breath $2,300,000
Box office-ah ‘Novocaine’ a chungnung ber
Get real time updates directly on you device, subscribe now.