Box office-ah Spider-Man a uai sang ber

Box office-ah Spider-Man a uai sang ber
A kar hnihnaah ‘The Flash’ ticket hralhna 70% chuangin a tlahniam nghal a, hetihrual hian tun weekend kalta khan North America-ah cinema hall ticket hralhna atanga dollar maktaduai 20 lalut tling thei film pakhatmah a awm lo bawk. Hetiang karah hian ‘Spider-Man: Across The Spider-Verse’-in a kar linaah dollar maktaduai 19.3 lalut lehin box office No.1 a ni.
Animated film ‘Spider-Man: Across the Spider-Verse’ hian North America-ah ringawt kar li chhungin dollar maktaduai 317.1 a lalut tling tawh a, US pawna a lakluh nen chuan dollar maktaduai 560.3 a tlin tawh bawk.
‘Elemental’ pawhin a kar hnihnaah dollar maktaduai 18.5 lalut lehin No.2 a ni. He film pawh hi ticket hralhna 39%-in a tlahniam a, chuti chung chuan No.2 a la ni pha tho a ni. Elemental hian ni 10 chhungin US-ah dollar maktaduai 65.5 a lalut tling ta a, US pawnah dollar maktaduai 55.6 lalut tawh bawkin, a vaiin dollar maktaduai 121.1 a lalut tling ta a ni.
Kar kalta box office No.1 DC leh Warner Bros. superhero movie, sum sen tamna ‘The Flash’-in beisei a pha lo a, a kar hnihnaah dollar maktaduai 15.3 lalutin No.3-ah a tawlh a, he film hian ni 10 chhungin US-ah dollar maktaduai 87.6 a lalut tawh a, US pawnah dollar maktaduai 123.3 lalut tawh bawkin, a vaiin dollar maktaduai 210.9 a tlin ve ta. He film hi a changtupa, Ezra Miller hi mipui lamin an ei lo deuh niin report a awm a, nikum lamah police te nen an inhnimhnai deuh sek a, chu chuan a channa film ticket hralh pawh a hi a nghawng deuh niin an ngai.
Jennifer Lawrence channa, film hlimawm lam ‘No Hard Feelings’-in dollar maktaduai 15.1 lalutin No.4 a ni. He film-ah hian Jennifer hi Andrew Barth Feldman nen chang dunin, rawlthar pakhatin mahni inrintawkna a neih that theih nan a nu leh pa ten hmeichhe pakhat chu hlawhin, an fapa ngaizawng der tura an tih dan vel tarlanna a ni. He film hian US pawnah dollar maktaduai 9.5 lalut bawkin, opening weekend-a a lakluh zawng zawng chu dollar maktaduai 24.6 a ni.
Top five khartu chu ‘Transformers: Rise of the Beasts’ niin, dollar maktaduai 11.6 lalut lehin No.5 a ni a, he film hian kar thum chhungin US-ah dollar maktaduai 122.9 lalut tawhin, US pawnah dollar maktaduai 218.3 a lalut tawh bawk a, a vaiin dollar maktaduai 340.4 a tlin ve ta bawk.