Box office-ah ‘Super Mario Galaxy Movie’ a No.1

Box office-ah ‘Super Mario Galaxy Movie’ a No.1
Animated movie videogame lar tak behchhana film an siam, chhungkaw kima en ngam chi ‘Super Mario Galaxy Movie’ chu Nort American box office No.1-ah a debut. He film hi Aatoan Horvath leh Michael Jelenic te direct niin, Charlie Day, Chris Pratt, Donald Glover leh Anya Taylor-Joy ten an aw an thawh.
Kar kalta kha Easter Weekend anih avangin chawlh a rei deuh a, chuvangin cinema hall pawh weekend satliah aiin an lun lehzual a, Good Friday chawlh tur nen, Ningani zan atangin cinema hall lam an lun a, ‘Super Mario Galaxy Movie’ pawhin ni nga chhungin khawvel huapin cinema hall ticket hralhna atangin dollar maktaduai 372.5 a la lut thei a, kumina film tlangzarhah chuan opening a sum la lut tam ber a la ni.
‘Super Mario Galaxy Movie’ hian US bikah ni nga chhungin dollar maktaduai 190.1 a la lut thei a, weekend (Zirtawpni – Pathianni), ni thum chhungin dollar maktaduai 130.9 la lut bawkin, box office No.1 a ni. US pawn, ram hrang hrang 80 atangin dollar maktaduai 182.4 a la lut thei bawk. He film hi kumina film tlangzarh zingah North America chauh pawh ni lo, khawvel huap pawhin opening weekend-a sum la lut hnem ber a la ni. Hei bakah hian animated film tlangzarh tawh zawng zawng zingah opening weekend a sum la lut tam pangana a ni pha bawk.
Ryan Gosling chenna Project Hail Mary-in a weekend vawi thumnaa dollar maktaduai 30.6 la lut lehin No.2 a la ni a, he film hian kar thum chhungin US-ah cinema hall ticket hralhna atangin dollar maktaduai 217.2 a la lut tawh a, US pawna a lak luh nen chuan dollar maktaduai 400 a pel ve tawh bawk.
Film tlangzarh thar Zendaya leh Robert Pattinson te chhanna ‘The Drama’-in dollar maktaduai 14.1 la lutin No.3 a ni a. Pixar leh Disney thawk dun film siam ‘Hoppers’-in a weekend vawi nganaah dollar maktaduai 5.8 la lut lehin No.4 a la ni a, he film hian US bikah dollar maktaduai 149.6 la lut tawhin, US pawnah dollar maktaduai 182.6 a la lut tawh bawk a, tihian a vaiin dollar maktaduai 323.2 a la lut tlin ta.
Box office Top 10:
1 The Super Mario Galaxy Movie $130,940,000
2 Project Hail Mary $30,653,869
3 The Drama $14,380,198
4 Hoppers $5,800,000
5 Reminders of Him $2,200,000
6 A Great Awakening $2,113,000
7 They Will Kill You $1,930,000
8 Dhurandhar: The Revenge $1,820,000
9 Ready or Not 2: Here I Come $1,800,000
10 Scream 7 $915,000