Box office-ah ‘Superman’ film thar a chetha

Box office-ah ‘Superman’ film thar a chetha
James Gunn film siam ‘Superman’ film thar chuan tun weekend kalta khan US-ah cinema hall ticket hralhna atangin dollar maktaduai 122 a la lut thei a, North American box office No.1 a ni. He film hian US pawn, ram hrang hrang 79 atangin dollar maktaduai 95 a la lut thei bawk a, tihian opening weekend a a lak luh hi dollar maktaduai 217 a tling. He film siam nan hian marketing tel loin dollar maktaduai 225 an seng a, marketing nen chuan dollar maktaduai 300 a hnaih deuh thuakin a rinawm.
Tunhnaiah superhero film hi mipuiin an kham deuh niin a lang a, box office lamah beisei an pha lo deuh riau thin a, kuminah pawh superhero film opening weekend-a US-ah dollar maktaduai 100 la lut thei an la awm lo a, Superman hi a hmasa ber a ni a, chumai bakah Superman film hrang hrang an tlangzarh tawhah chuan opening weekend-a US-a sum hmu tha ber a la ni.
He film-ah hian David Corenswet chu Superman lemah changin, Rachel Brosnahan chu Lois Lane neiin, Nicholas Hoult chu Lex Luthor lemah a chang ve thung a, anni bakah hian Skyler Gisondo (Jimmy Olsen), Isabela Merced (Hawkgirl), Beck Bennett (Steve Lombard), Nathan Fillion (Guy Gardner), Anthony Carrigan (Metamorpho) leh Edi Gathegi (Mister Terrific) te pawh an inlan.
‘Jurassic World Rebirth’-in dollar maktaduai 40 la lut lehin No.2-ah a tawlh ta a, he film hian kar hnih chhungin US-ah dollar maktaduai 232.1 a la lut man tawh a, US pawnlama a lak luh nen chuan dollar maktaduai 529.5 a tlin der tawh.
Joseph Kosinski film siam, Brad Pitt channa ‘F1: The Movie’-in dollar maktaduai 13 la lut lehin No.3 a ni a, he film pawh hian kar thum chhungin US-ah dollar maktaduai 136 la lut tawhin, US pawn nen chuan dollar maktaduai 375 a tlin ve tawh bawk.
Live-action movie ‘How To Train Your Dragon’ pawh a la kaltluang viau a, dollar maktaduai 7.8 la lut lehin, tihian kar nga chhungin US-ah maktaduai 239.8 a la lut tling tawh a, US pawn nen chuan dollar makltaduai560/8 a tling tawh.
Box Office Top 10:
1 Superman $122,000,000
2 Jurassic World Rebirth $40,000,000
3 F1: The Movie $13,000,000
4 How to Train Your Dragon $7,800,000
5 Elio $3,900,000
6 28 Years Later $2,725,000
7 Lilo & Stitch $2,700,000
8 Mission: Impossible—The Final Reckoning $1,450,000
9 M3GAN 2.0 $1,350,000
10 Materialists $720,498