Marvel Studios leh Disney superhero movie an tlangzarh thar, ‘The Marvels’ chuan beisei pha chiah lo mah se tun weekend kalta khan North America-ah cinema hall ticket hralhna atangin dollar maktaduai 47 lalutin, North American box office No.1 a ni tho mai.
‘The Marvels’ hi 2019-a Brie Larson channa ‘Captain Marvel’ chhunzawmna ang deuh a ni a, kha film kha chuan opening weekend-ah US-ah dollar maktaduai 153.4 a lalut thei a, khawvel huapin dollar tluklehdingawn 1.13 a lalut tawh nghe nghe a ni.
‘The Marvels’ hian US pawn, ram hrang hrang 51 atangin dollar maktaduai 63.3 a lalut bawk a, tihian opening weekend-a a lakluh chu a vaiin dollar maktaduai 110.3 a tling. Chutihrualin he film hi dollar maktaduai 200 senga siam a ni a, marketing nen chuan dollar maktaduai 300 dawn a tling ang a, opening weekend-ah hian a che tha vak lo tlat a ni.
The Marvels-ah hian Brie Larsson bakah Iman Vallani a inlan a, ani hi Disney+ series ‘Ms. Marvel’ star a ni a, Teyonad Parris pawh Monica Rambeau lemah a chang ve bawk. He film-ah hian hmeichhe pathum chu a changtu ber niin, Nia DaCosta direct a ni a, ani hi mihang hmeichhe zinga Marvel Studios movie direct thei hmasa ber a nih bakah MCU film director ni tawh zinga naupang ber niin, kum 34 mi chauh a la ni.
Horror movie ‘Five Nights at Freddy’s’-in dollar maktaduai 9 lalut lehin No.2 a la ni a, he film hian kar thum chhungin US-ah dollar maktaduai 127.2 a lalut tling ta a, kumina horror movie tlangzarh-ah chuan sum lalut hnem ber a la ni a, US pawnah dollar maktaduai 124.7 lalut tawh bawkin, a vaiin dollar maktaduai 251.9 a lalut tling tawh.
Taylor Swift: Eras Tour pawhin dollar maktaduai 6 lalut lehin No.3 a la ni a, he concert movie pawh hian US-ah dollar maktaduai 173 a lalut tling ta a, Martin Scorsese film siam ‘Killers of the Flower Moon’-in dollar maktaduai 4.7 lalut lehin No.4 a la ni a, he film pawh hian US-ah dollar maktaduai 60 a lalut tling ta a, Sofia Capolla film siam, Elvis Presley nupui hlui Priscilla Presley chanchin behchhana chan ‘Priscilla’ pawhin dollar maktaduai 4.8 lalut lehin, No.5 a la ni a, he film hian kar thum chhungin US-ah dollar maktaduai 12.7 a lalut ve ta bawk.
Box office-ah ‘The Marvels’ a No.1
Get real time updates directly on you device, subscribe now.