Box office-ah ‘Wicked For Good’ a No.1
Box office-ah ‘Wicked For Good’ a No.1
Ariana Grande leh Cynthia Enrivo te channa ‘Wicked: For Good’ chuan tun weekend kalta khan US-ah cinema hall ticket hralhna atangin dollar maktaduai 150 lalutin, box office No.1 a ni a, Broadway show behchhana film an siam tawh zingah opening weekend-a sum lalut tam pathumna a ni pha bawk.
Wicked: For Good hian Zirtawpni kalta khan North America-ah cinema hall 4,115 a ticket hralhna atangin dollar maktaduai 68.7 a la lut thei a, hei hi Broadway show behchhana film siam zingah opening day a sum lalut tam ber a la ni.
He film hian US pawnah ram hrang hrang 78 atangin dollar maktaduai 76 a la lut thei bawk a, tihian opening weekend-a khawvel huapa a lakluh chu dollar maktaduai 226 a tling.
He film hi Jon M. Chu direct niin, ‘Wicked’ film pahnihna a ni a, Ariana Grande chu Glinda the Good Witch lemah chang lehin, Cynthia Enrivo pawh Elphaba, Wicked Witich of the West lemah a chang leh a, Jeff Goldblum leh Michelle Yeoh te pawh an inlan. Nikuma an tlangzarh ‘Wicked’ film khan opening weekend-ah US-ah dollar maktaduai 112.5 a la lut thei a, a film pahnihna hian a rawn khum thei tlat. ‘Wicked’ hian tunah chuan khawvel huapin dollar maktaduai 750 dawn a la lut tling tawh a ni.
Kar kalta box office No.1, ‘Now You See Me: Now You Don’t’-in a weekend hnihnaah dollar maktaduai 9.1 la lut lehin No.2-ah a tawlh a, he film hian kar hnih chhungin US-ah maktaduai 36.8 la lut tawhin, US pawna a lak luh nen chuan dollar maktaduai 146.2 a tlin tawh thung.
Box office No.1 pawh lo ni tawh ‘Predator: Badlands’-in a weekend vawi thumnaah dollar maktaduai 6.25 la lut lehin, No.3 a la ni a, tihian kar thum chhungin US-ah maktaduai 76.3 a la lut tling ta a, US pawn a a lakluh nena belh chuan maktaduai 159.6 a tlin tawh bawk.
The Running Man-in weekend vawi hnihnaah dollar maktaduai 5.8 la lut lehin No.4 a la ni a, tihian kar hnih chhungin US-ah maktaduai 27 a la lut tling tawh a, US pawna a lak luh nen cuan maktaduai 48.3 a tling ve tawh bawk.
Film tlangzarh thar dang Brendon Fraser channa ‘Rental Family’ chuan US-a cinema hall 1,925 ticket hralhna atangin dollar maktaduai 3.3 la lutin, No.5-ah a debut
Box office top 10:
1 Wicked: For Good $150,000,000
2 Now You See Me: Now You Don’t $9,120,000
3 Predator: Badlands $6,250,000
4 The Running Man $5,800,000
5 Rental Family $3,300,000
6 SISU: Road to Revenge $2,600,000
7 Regretting You $1,520,000
8 Nuremberg $1,140,000
9 Black Phone 2 $1,000,000
10 Sarah’s Oil $771,542