Boxer ropui Oleksandr Usy

Tennis huangah Serbia pa huaisen Novak Djokovic a ropui fal a. Lionel Messi chu khawvela mihring piang tawh zawng zawng zinga footballer ropui ber anga ngaih niin’ football a thleng chhuak’ an ti hial a. Chutiang bawkin Basketball huangah LeBron James a ropui fal leh bawk. Infiamna hrang hrangah mibik an awm zel a, infiamna rothap boxing-ah pawh mibik, boxer ropui ber ang hiala chhal ngam a awm ve leh bawk a. Boxer ropui bera chhal ngam chu Ukranian pa huaisen Oleksandr Usyk a ni.
Palian huanga kawnghren pali kawl kawp thei hmasa ber Oleksandr Oleksandrovych Usyk hi January 17, 1987 khan Ukraine-ah a piang a. Naupang te a nih laiin pneumonia vangin a boral teuh hle. Hemi tum hian Doctor te pawhin an fapa chu chhan ngaihna awm tawh lo a nih thu an hrilh hman hial nghe nghe. Pneumonia vang hian thla hnih zet damdawi inah a awm hial a ni. Vanneihthlak taka a damchhuah leh hnuin football a tuipui a, a pa dam lai chuan infiamna dang tikawp chungin football a khel ve thin. A pa boral hnuin an harsa zual a, an tan football khelh chu thil hautak a tlin tak vangin hautak lo zawka khelh theih boxing a luh chilh ta zawk. Boxing a luhchilh tirh hian Usyk hi kum 15-a upa a ni.
A huaisenin a paukhauh bawk a Usyk hian boxing a thiam chak hle. Weight hrang hranga a khelh chho hnuin palian (heavyweight) huangah par a chhuang a, hlawhtlinna a chang. Palian huangah hian kum 2009 khan World Championships-ah pathumna a ni. A beisei ang hlawhtlinna sang chang mai lo mah se tumruhna sang zawk nen a inbuatsaih zui a, kum 2011 khan Gold Medal lain World champion a ni ta nge nge. 2011-ah World Champion a nih vangin Olympic hmachhawn turin a tling a. London Olympic 2012-ah palian champion niin Gold Medal a la zui leh. Amateur huanga a inlan chhung hian inhnek vawi 350 zet inhnek a hmachhawn a, vawi 335 hnehna changin, tlawm zawkah vawi 15 chauh a tang.
Amateur huanga lawmman hlu ber Olympic Gold Medal a lak hnuin kum 2013 khan boxing khawvela a huang zauh leh zual turin professional boxing a luhchilh. Professional boxing a luh chilh hian kum 26 a upa a ni a. Palian huanga boxer lar pahnih Klitschko te unau (Vladimir leh Wladimir Klitschko) te hnuai K2 Promotions-ah a inziak lut a. Pro boxing a luhchilh tan tirh hian cruiserweight huangah a inlan.
Professional huanga a hmachhawn hmasak ber hi Mexican boxer Felipe Romero a ni a, round nganaah a knockout. Hnehna a chan zel hnuin WBO Inter-Continental cruiserweight kawnghren hren theihna hun remchang a nei ta a. A khingpui Danie Venter hnehin professional huanga a kawnghren hmasa ber a hlawhchhuak. A hmaa ding apiangte a knockout zat zat hnuin June, 2016 khan wolrd champion nih theihna hun remchang a nei. WBO cruiserweight champion zawnnaa a khingpui Krzysztof Glowacki chu tlawm nei lova kaltluang mek; boxer tha tak a ni. Krzysztof Glowacki hi knockout zo lo mah se hnehna a chang ta tho a, WBO cruiserweight champion niin, World champion a ni ta nge nge.
WBO cruiserweight champion a nih hnuin kawnghren kawl lai a humhim zel a., kawnghren dan lak belh theihna hun remchang a nei zui ta bawk. Cruiserweight huanga kawnghren dang kawl ve tu Murat Gassiev nen inhnekin cruiserweight huanga kawnghren awm zawng zawng an inchuh a. Usyk hian amah ang tho va tlawm nei lova kal tluang mek Murat Gassiev chu hnehin IBF ,WBO leh Ring Cruiserweight kawnghren a lak belh a. Hnial rual lohin Cruiserweight huanga boxer tha ber a ni.
Palian huanga a khingpuite aia te zawk zel mah se a huaisena leh a thiamna ril hmangin Usyk hian hnehna a chang chho zel. Palian huangah hian Chazz Witherspoon leh Derek Chisora te a hneh hnuin kawnghren chuhna hun remchang a nei zui leh ta a. A kawnghren chuhpui tur chu boxer lar Anthony Joshua a ni.
Joshua a hmachhawn mai theih danah Usyk hi a vannei tel ve bawk. Hetih hun lai hian British boxer lar pahnih, palian huanga champion ve ve bawk; Anthony Joshua leh Tyson Fury te palian huanga kawnghren pali la hmasa ber ni thei turin inhnek an tum mek a. Inhnek tura an indawrna pawhin a thleng thui viau tawh. Hlawkna insem dan turah an inrem theih tak loh vangin Tyson Fury-a’n Joshua hmachhawn lovin Deontay Wilder hmachhawn nawn leh a thlang. Fury-a’n Wilder a hmachhawn dawn tak vangin Joshua-a khingpui tur zawn a ngai ta a, chu tak chu Usyk tan hun tha a lo ni ta a ni.
Palian huanga boxer lar, tum hnih ngawt champion lo ni tawh, cha mai bakah Olympic champion pawh lo ni tawh bawk Anthony Joshua lakah Usyk hian rin a kai lo hle. Mah se, mak tak maiin hnehna changtu zawk chu Usyk a ni teh tlat. Joshua nen hian September, 25, 2021 khan Tottenham khelmuala mipui khat tlat hmaah an inhmachhawn a, inhnek hmuhnawm tak an lantir. He inhnek hmuhnawm takah hian pumraw te zawk leh rin kai lo zawk Uysk chuan boxing thiamna ril a neih thatzia a lantir a, endiktu pathumte point pekah chungnung vekin hnehna a chang a. Palian huanga kawnghren ngaihhluthlawh pathum; WBA, WBO leh IBF kawnghren te chu Joshua kut atangin a laksak a, palian huangah a vawi khat nan World champion a ni.
Boxer lar leh pian tha zet mai Anthony Joshua hian a kawnghren hloh tak lak let ngei tumin Usyk hmachhawn nawn leh mah se Ukranian pa huaisen Usyk tlakah a tlawm nawn leh tho thung. Joshua a hneh nawn hnuin Usyk hian khaw dang a hawi thei ta a, Deniel Duboise a knockout leh zet hnuin WBC kawnghren kawl mektu Tyson Fury a cho zui nghal a, a cho chhuak ta nge nge.
Hetihlai hian palian huanga boxer tha ber chu Tyson Fury a ni. Boxer palian, tuan rang leh huaisen Fury hian a tumpui apiang hneh zel mai a, amah tum tawk ve deuh Deontay Wilder pawh ngei pawh vawi hnih hnehin a boruak lian chho mek a chhem mih sak hmiah bawk. Fury hi palian zingah pawh palian a ni a, Usyk erawh chu palian huanga pa te a ni thung. An pumrua an inlen hleih em vangin mi tam zawkin Fury hian Usyk hi hneh ngei turah an ngai nghet hmiah a. Usyk hian chak zawka ringtu a nei mang lo.
Palian huanga kawnghren pali kawltu tur zawnna hmasa ber hi ram hausa Suadi Arabia in a thleng a, 18 May, 2024 khan khawvelin inhnek ropui a thlir. Inhnek tir lamah chuan Tyson Fury-a’n a khingpui Usyk a zuam ngang mai a, mipui khelin boruak siam a tum viau bawk. A khingpuiin zuam hle mah se huaisen leh tuarchhel bik Usyk hian zuam ngawt chi a nih lohzia chiang takin a lantir a, Rudy hi round 9-naah a knockout teuh hle nghe nghe. Inhnek a zawh meuh chuan inlehthalna lian a thleng a, Oleksandr Usyk chuan split decision hmanga hnehna changin tlawm nei lova kal tluang mek Tyson Fury hneh hmasa ber tu a ni a. Palian huanga kawnghren pali kawl khawm thei hmasa ber niin, palian huangah record thar a siam ta hial a ni.
Boxing-a palian huangah hian kawnghren pathum a awm reng thin. Kawnghren pathum a awm lai WBC, WBA leh IBF kwnghren hreng kawp thei hnuhnung ber chu Lenox Lewis a ni. WBC kawnghren kawl mektu Lewis hian March, 13, 1999 khan New York khawpuiah WBA & IBF kawnghren kawl mektu Evander Holyfield a hneh a, palian huanga kawnghren awm zawng zawng a kawl khawm. Palian huangah kawnghren pathum a awm reng hnuin September 25, 2021 atang khan WBO (World Boxing Organisation) kawnghren tel belh a ni. Usyk hi Lewis hnu lamah kawnghren pathum kawl kawp leh thei hmasa ber a nih rualin, palian huanga kawnghren pali kawl khawm thei hmasa ber a ni tel bawk tihna a ni.
Inhnek hmuhnawm leh pawimawh taka a hneh tak Fury nen hian December 21, 2024 khan Saudi Arabia khawpui Riyadh-a Kingdom Arena-ah an inhmachhawn nawn leh ngat a. An inhnek hmasak zawk aia chiang hretin Usyk hian hnehna a chang a, Fury hneh a hneh nawn leh. Fury a hneh nawn leh thei hian boxer tha bik a nihzia a lantir chiang hle.
Boxing a thiamna ril nei Usyk hian cruiserweight huanga a khelh laiin kawnghren lak theih zawng zawng a la tawh a. Palian huanga a insawn hnuin kawnghren lak theih zawng zawng a la leh vek bawk a. Inelna ngaihhlut hlawh tak Olympic-ah Gold Medal a lo la tawh bawk nen video game-a thlen tur ang zawng zawng thleng a, hmabak awm zawng zawng hlenchhuak vek tawh ang mai hian Usyk pawhin boxing-a hlawhtlinna a chan theih zawng zawng a chang vek tawh a. Boxing-a a tih tur hlenchhuakin, boxing a thlengchhuak a ni ber tawh. Chu vangin boxer ropui ber tia chhal ngam a ni.
“Palian huangah i hlawhtling ve thei lo ang’ min ti a, kan tet bik vanga miin min nuihzat chang pawhin hma lam ka thlir tlat thin. Ka khingpui tur ngaihtuahin hun ka seng ngai lo. Tu pawh hmachhawn ila ka theihna sang ber lantir a, keimaha tha ber lantir turin ka inbuatsaih chawt thin. Ramsa zingah Sai a lian ber a, Sai a len ber laiin ramsa zinga huai leh thil tithei ber chu Sakei a ni tlat thung si”, ti tu Oleksandr Usyk hi mihring piang tawh zingah boxer ropui bera chhal mek a ni.