Boycott-ah vau mah se World Cup draw chhim tum Iran

Boycott-ah vau mah se World Cup draw chhim tum Iran
Vawiin hi 2026 World Cup draw hun kha a lo ni ta a, visa chungchanga an lawm loh avangin Asian heavyweight ni kumhlun Iran chuan politik thila an sawrkar hmelma lian ni kumkhua United States khawpui Washington DC-a World Cup draw hi boycott-ah an vau thur thur a, mahse, Iran coach Amir Ghalenoi leh Iran FA aiawh pakhat chu US zin turin an ti leh ta zawk a, draw boycott em chu an kaltlangpui ta lo!
Iran hian 2026 World Cup draw chhim turin US sawrkar hnenah visa pakua an dil a, chu’ng zinga pali chauh chu America luh phalsak niin, hnawl zingah hian Iran football federation (FFIRI) president Mehdi Taj pawh a tel a, US thiltih danah FFIRI an lawm lo a, draw boycott-ah hial an vau ta a ni.
Taj hian tunkar khan an harsatna tawh chungchang chu Fifa president Gianni Infantino a sawipui a, an visa dil zawng zawng pek an nih loh chuan Zirtawpni draw-ah Iran mi reng reng an tel loh mai theih thu a hrilh nghal a, mahse, Iran coach Ghalenoi bakah FFIRI hnuaia head of international relations hna chelh mek Omid Jamali-te chu US zin tur hian an ti leh ta zawk a; anni pahnih bakah hian Iranian dangte pawhin an belhchhah mai thei niin media lamin an ziak a, he thu buatsaih lai hian midangin United States an thlawklut ta chiah em hriat hman a ni lo.
Kumin June thla khan US President Donald Trump chuan executive order ziakin, tah chuan politik leh ram venhimna lam thil avangin ram 12-te chu an mi leh sa US-a luh khap a ni.
US-in a hrek zingah Iran pawh hi telin, he executive order hian 2026 World Cup leh Los Angeles khawpuiin 2028 Olympics a thlen huna infiammite leh coaching staff-te zin khapna tel lo mah se US hmelma lian ber Iran visa dilna chu a vai vaiin an pawmsak duh ta chuang lo a ni!
Iran tan nakkum tournament lian hi World Cup-a tum sarih an inlanna tur leh a zawna vawi li an tlinna chiah a ni.