BP sang tan cherry juice a tha

Hypertension (BP sang) nei ten an blood pressure control turin damdawi an ei a ngai fo thin. Mahse, tunah chuan mithiam ten zirchianna an neih hnuah cherry juice chu BP damdawi mum ang maia tha a ni tih an hmuchhuak.
Northumbria University, Newcastle-a mithiam ten zirchianna an neihah chuan mipa BP sang nei ten Montmorency cherry concentrate an in chuan an BP 7%-in a hniam nghal thei tih an hmuchhuak a, hei hi BP damdawi pangngai (anti-hypertensive medication) in BP a tihhniam theih dan level nen pawh a inbuk tawk vel viau niin an sawi.
Zirchianna neitu te hian BP sang nei ve tan deuh 130/90 mmHg leh a chunglamah enchhinna hi an nei a, participant-te chu cherry concentrate an in atanga darkar thum vel chhungin an BP chu 7 mmHg in a tlahniam hman niin an sawi.
Mithiamte chuan cherry concentrate-ah hian phenolic acids, protacatechuic leh vanillic a awm niin an sawi a, heng compound-te hi BP a thlakhniam theihna chhan niin an ngai.
Zirchiannaa an hotu Karen Keane chuan, “Blood pressure a tihhniam theih dan hi anti-hypertensive drug mum khatin hna a thawh theih dan nen pawh khaikhin theih tak a ni a, hei hian Montmorency cherries hi BP sang enkawl nan a hman theih dawn tih a entir a ni,” a ti.
He zirchianna chungchang hi The American Journal of Clinical Nutrition-ah tihchhuah a ni.