Brazil ram khawchhe hnuaiah Verstappen chak ve leh ta hlawl!

Kan hnung chho intlansiak thenkhatah a bike khalh dan avanga sawisel hlawh tak leh lawmman semna dawhsan chuankai harsat chho ta tlat Max Verstappen chuan khuain a bumro chung chunga tlan zawh tak Sao Paulo Grand Prix-ah hnehna a rawn chang chho ve leh ta nawlh a, a title kawl lai humhima vawili champion tling turin dinhmun tha zetah a ding ta.
An tlan leh tur November ni 23 Las Vegas race-ah hian amah hnaihbertu Lando Norris nena an inkar point 60 tala a pawhzau theih chuan intlansiak vawihnih hmabak la awm chungin world champion a ni fel tawh ang.
Pathianni race-ah Red Bull driver Verstappen hian 17-na atanga tlan chhuak chungin pakhatna dinhmun a luah thei a, a career-a a hnehna chan ropuiberte zinga mi niin, defending champion chu defending champion nge nge an lo ni e!
Title race-a a elpui lian Lando Norris of McLaren tan intlansiak harsa tak a ni thung a; vawi duai lo tihsual a neih hnuah parukna a luah pha hram a, intlansiak vawithum la awmah a chung chiaha hmahruaitu Dutchman nen point 62-a inthlau tawhin, America leilunga an tlan leh turah hian a chetchhiat leh chuan a tan champion beiseina a bo thei a, mahse, intlansiak vawithum la awmah hian point 86 hmuh tur a la awm avangin Briton driver Norris-a tan Verstappen hmakhalhna ‘chance’ a la bo lo thung.
Sao Paulo Grand Prix-a lawmman semna hniam zawk pahnih luahtute hi rin loh takin BWT Alpine F1 Team-ah pawh French mi ve ve niin, Verstappen hnung chiaha thleng chu Esteban Ocon a ni a; pathumna chu a team-mate Pierre Gasly niin, an driver pahnih podium lawn hian thawklehkhatah Alpine season a rawn tidanglam dawrh a, constructors’ championship lamah pawh pakuana atangin paruknaah an inhlangkai chho ta hial a ni!
Ruahsur hnuaia tlan Sao Paulo race-ah hian chesual leh thil thleng neuh neuh a tam hle a, red flag vawikhat hmuh tur awmin, safety car pawh vawihnih a tlanlut hman a; intlansiak harsa taka a hnehna sualchhuah kha Verstappen-a tan Formula One race-a vawi 62 a chakna ni satliah mai loin tlankawng huh (wet-weather) hnuaia hnehna ropui ber ber kan hmuh tawhte zinga pakhatah an chhiar tel!
Tarlan tawh thin angin, kum laihawl atang khan Red Bull driver hian harsatna a tawk chho ta tlat kha a ni a, tun kha June thla Spanish Grand Prix hnu lama a chak leh vawikhatna chiah niin, a hun dik taka thutlukna (strategic decision) an siam fuh a hlawkpui a tih theih ang a, Formula 1 chhungkuaah mi tam takin khawvela driver tha ber an lo tih chhan pawh Brazil tlankawnga a car khalh dan khan a nem nghet ruak awm e!
Dutchman hi 12-na atanga tlan chhuak tawk turin qualifying lamah a chetha tawk lo a, chutah he intlansiak atana engine chakna thahrui hman phal chin bithliah a pelh avangin hremna pek a ni a, Pathianni race a thlen meuh chuan 17-na daih atangin a tlanchhuak thei hram a ni!
A bultanna hnufual mah se engang driver chiah nge a nih a pholang zui ta a ni.
Pole position atanga tlanchhuak Norris thung chu hun paiwmawhah a talbuai ta tlat a, an tlanchhuak chiah tihah Mercedes driver leh a chipui ni bawk George Russell chan lehpel nghalin, hetih lai hian Verstappen pawhin lap khatna lekah hma a lo sawn ve duai duai bawk a, kual khatna lekah hian a hmaa awm paruk lehpel hmanin, lap 12 an tlan meuh chuan parukna a luah chho hman der tawh!
Tarlan tak angin, season kal laia intlansiak vawithum chiah awm tawhah hmahruaitu pahnih Max Verstappen leh title race-a a elpui awmchhun ni tawh Lando Norris-te hi la inlehthal thei an la ni a, chutih rualin, season hmawrbawk hnaih lam, boruak sosan chhoh zual chinah driver ropui Verstappen chuan a zia tak tak a rawn chhuah chho tan tlat mai a, an tlan leh tur Las Vegas-ah hian McLaren driver tan chetsual a rem tawh lo hle a ni.