Brazil tlawm zanah Argentina chak

Brazil tlawm zanah Argentina chak
Thawhlehni South American World Cup qualifying match pahnihah Argentina leh Brazil chechhuakin, Uruguay rama zinchhuak Brazil tlawm laiin Peru ramah Argentina an chak thung.
Peru 0-2 Argentina
Captain Lionel Messi chuan mikhual team chakna goal hnih khungin, nikum December thla World Cup-a a ram a champion-pui hnu khan ARgentina tan a la thawhhlawk kal zel.
Kum 36 zeta upa ni tawh Messi hian first half minute 32-ah Nicolas Gonzalez siamsak atanga a goal hmasa zawk thunin, minute 10 a liam leh rualin a goal hnihna a khung zui leh a, he goal hi Enzo Fernandez chhawpsak a ni thung.
Messi hian second half-ah hat-trick siam theihna hun remchang nei bawk mah se a goal thun chu VAR-in a endik hnuah offside tiin hnawlsak a ni.
Ti hian, Conmebol World Cup qualifiers bikah goal 31 khawl tling tawhin, goal 29 thuntu Luis Suarez lehpelin South American World Cup qualifying khel tawh zawng zawng zinga goal khung hnem ber nihna a pumbilh.
Inkhelh banah Messi chuan an team fakin, awihawm loh khawpa thiam an nih thu leh an khelh apiangin khawvela team thaber ni thuak thei khawpin an khel zel thei niin a sawi!
Inter Miami captain chuan, “Kan game khelh dan enin kan puitling hle tawhin ka hria a; World Cup-a kan champion hnu khan kan inringtawk a, eng hunah pawh kan hahdam thlap a, tunhma aiin kan inpumkhatna a tha a, kan ngialnghet zawk bawk. Hma kan la sawn lehzel pawh ka beisei,” a ti.
Forward Messi hian hliam avangin thla hmasa khan Inter Miami tan US Open Cup final a khel thei lo a, a awm hnua chak chho tluang zet Miami chu he final-ah hian Houston Dynamo hneh loin an tlawm a; September ni 21 atang khan a club tan starting line up a chang leh ta lo a, international break laiin ram tan a vul zui leh ta a ni.
Karliamta Ningania sikhat faia Argentina-in Paraguay an hneh tum khan substitute ni chungin a khel a; Thawhlehni zan Lima game-ahg erawh lut hmasa zingah a tel a, goal hnih khungin record thar a siam zui leh chiah bawk.
Argentina head coach Lionel Scaloni chuan an team-in hun rei tawh tak atanga Messi khelhpui dan thuruk an man tawh thu sawi chungin chu chu an captain pawhin a hlawkpui niin a ngai a, nuamti taki ram tan a khel tih a sawi.
Scaloni chuan mi zawng zawngin khelmuala a chetla lai hmuh nuam an tih vek avangin a theih anga rei ram tan leh a khelh mekna club tan pawh a inlan chhunzawm zel a beisei thu a tarlang tel.
Thawhlehni qualifiers dangah Uruguay chuan sihnih faiin an mikhual Brazil an hneh a; Venezuela lakah sithum faia Chile tlawmin, Paraguay chuan sikhat faiin Bolivia an hneh a; Ecuador leh Colombia chu goal awm loin an inhnehtawk thung.
Argentina hian khelh lia point 12 hum chungin CONMEBOL standing-ah hma an hruai chhunzawm zel a; November ni 16 khian table-a pahnihna luahtu Uruguay an mikhual ang a, ninga a liam rualin pathumna ni mek Brazil an su zui leh ang.
Qualifiers an khelh leh tur pahnihah Peru chuan Bolivia leh Venezuela an hmachhawn thung dawn a ni.
Uruguay 2-0 Brazil
Thawhlehni zan South American World Cup qualifying match pakhatah Brazil-in point an hlawhchhuak zo lo a, an buaina belhchhah turin an forward chhuantawlawl Neymar chuan hliam avangin mittui nen khelmual a chhuahsan.
Neymar hian thla hmasa mai khan Pele record khumin Brazililian mipate zinga ram tana goal khung hnember nihna a chang thar a, mahse, Montevideo khaw inkhel first half zawh dawn lamah Nicolas de la Cruz nena ball an inchuh laiin khup hliam serious tak ni tura hlauhthawn a tawk zui ta tlat a, khelmual atanga zawnchhuah a ni.
Brazil captain Casemiro chuan Globo television hnenah an forward hliam chu a serious loh hram an beisei thu sawi chungin, “Kan tana player pawimawh a ni a, team pumpuiin kan ngaina vek a ni. Hliamin a tibuai thei hle mai a, bul a han tan leh thei a, hliam bawkin a tlakbuak leh thin,” tiin Neymar-a vanduai chungchang a sawilang tel.
Liverpool forward Darwin Nunez chuan minute 42-ah Uruguay goal hmasa zawk tauhlutin, second half minute 77-ah De la Cruz-a goal thun tur a siamsak zui leh ngat a ni.
Tun kha kum 2001 hnu lama Uruaguay-in Brazil an hnehleh vawikhatna chiah a ni.
Brazil tan game chhe tak a ni a, hun pumin goal zawnah vawikhat lek pawh ball an thawnlut zo lo a, kum 2015 hnu lama World Cup qualifier-a game 37 an tlawm loh zawn kal mek tawpna an tawngbaw chiah bawk.
Thawhlehnia an point thum hlawh-chhuah nen Uruguay chuan khelh li atanga point sarih neiin CONMEBOL standing-ah pahnihna an luah chho a, pathumna Brazil leh palina Venezuela-te nen an point hmuh a inzat.