Brigade Field siamthatna atan cheng nuai 500 dah

AMC Sport Complex (Brigade Field) chu inkhelhna tlaka siamthat ngei an tum a, chumi atan chuan cheng nuai 500 an dah tih chief minister Lalduhoma chuan a sawi.
ZPM Thalai Hqrs hruaitute chuan Ningani khan chief minister hi a office-ah an kawm a. Bawngkawn Brigade-a AMC Sport Complex leh National Highway-06 kawngpui siamthat mek chungchanga hma an lak dan an sawipui.
Chief minister hian Mizo thalaite hmakhua ngaia AMC Sport Complex siamthat chungchang ZPM Thalai-in an bawhzui chu lawmawm a tih thu a lo hrilh a. ZPM sawrkar chuan siamthat hna an thawh rualin hmasawnna thar an thlentir mek a, AMC Sport Complex pawh hi inkhelhna tlaka siam that ngei an tum a, chumi atan chuan sum pawh nuai 500 an dah tih a sawi a ni.
He field hmang tangkai tur Mizo thalaiten an nghakhlel hlea a hriat thu Lalduhoma hian sawiin, “Sulhnu pawr chinfel hian hun a duh rei thin avangin kan tum leh duh ang pawh kan ti hlawhtling zung zung thei lo chungin, hmasawnna tam tak kan thlentir mek zel a, mipui tawiawmna zar liau liau a ni. Tun dinhmunah mipui pawh ZPM sawrkarah kan lawm tlangin ka hria,” a ti.
NH-06 chungchangah kawngpui tha neih theihna tura sawrkar leh mipuiin theihtawp an chhuah hona azarah hmasawnna an hmu chho zel a, furpui a lo thlen apianga kumtin kawngpui chhia vanga harsatna kan tawh thin pawh kuminah chuan kan pumpelh thei dawna a lan thu a sawi. NH-06 chungchangah NHIDCL leh Ministry of Road Transport & Highways nen thawhhona tha tak an nei tih a sawi a ni.