Brighton lakah Chelsea an tlawm chiang

Zirtawp zan khan English Premier League khelh chhunzawm a ni a, paruknaa awm mek Chelsea chu Brighton lakah si thum fai ngawtin an tlawm. Brighton lakah an tlawm vangin Chelsea hian top 4 huanga kir theihna hun tha an hloh.
American Express Stadium-a an mikhual Chelsea lakah Brighton in bul an tan tha viau a, chawlhlawk darkar chanve hmain goal hnih an thun hman. Point thum hmua palina luah let leh thei tur Chelsea hian hnehna chan ngei tumin tan an khawh a, beiseiawm takin bul an tan. Inkhel tir lamah an player pawimawh Cole Palmer chuan goal thun theihna hun tha vawi hnih a hlah. An mikhual ten na taka an nawr chungin Brighton an him hram hram zel a, goal thun hmasa zawkah an tang ta hial zawk. Si nghak Bart Verbruggen ball pek tha tak dawngtu Kaoru Mitoma chuan leihrulah fuh zetin a pet goal a, minute 27-naah hmahruaina goal a thun.
Goal chhuah hmasa zawk an nih vangin Chelsea in an si phurh sut ngei tumin tan an khawh zui nghal chat a, hun tha an nei zawn. Pedro Neto-a’n a hun tha neih a hlah hnuin captain Enzo Fernades chuan tauh goal in an si phurh a sut. Goal thun bawk mah se Fernandes hian Brighton defender a nam vangin a goal thun pawmsak a ni lo va, mualneitu an him nawn leh. Goal an chhuah thelh hnuin Brighton an che fuh zui leh zat a, fuh taka an khingpuite an nawr tlang hnuin Yankuba Minteh chuan hnaite atangin a pet goal a, minute 38-naah an goal hnihna a thun a. Brighton hian si hnih faia hmahruai chungin chawlhlawk an hmang.
Chawlhlawk hnu lamah Brighton an khel tha chhunzawm a, goal an thun leh thuai. Fuh taka an mikhualte an nawr tlang hnuin Yankuba Minteh chuan near post-ah fuh zetin a pet goal a, minute 63-naah an goal thumna a thun. Si thum ngawt an phurh hnuin Chelsea in an si phurh sut tumin tan an khawh nasa hle a, hlauhawm siam thin bawk mah se si nghak Verbruggen an paltlang zo lova, an si phurh an sut thei lo. Hun tha nei bawk mah se Brighton pawhin goal thun belh thei tawh bik lo mah se, an mikhual Chelsea lakah si thum fai ngawta chakin, point thum hlu tak an hmu zui ta a ni.
Brighton lakah an tlawm vangin Chelsea in hma an sawn thei lova, khelh 25 atanga point 43 hmuin parukna an luah chhunzawm. Hetihlai hian team lian lakah hnehna an chan vangin Brighton & Hove Albion hian European competition khelh phak beiseina sang zawk an nei thar ve thung