British record fee nen City-ah Trafford a kir

British record fee nen City-ah Trafford a kir
Goalkeeper James Trafford chuan Burnley atangin a club hlui Manchester City a zawm fel leh ta a, Clarets atanga Etihad club-in an leichhuahna man hi Manchester khaw club lam atanga media-te thu hmuh dan chuan pound maktaduai 27 kai chho thei tur a ni
City hian a tirah pound maktaduai 27 hi an pe tla nghal dawn tihna a ni lo a, a khelh that leh chetthat dan (add-ons) azirin heti zat sum hi tling chho tur a ni.
Hetih lai hian Burnley source atanga media-te thu hmuhah chuan Trafford-a man hi add-ons leh contract zawh hmaa khulh chhuahna man nen belhkhawm vekin pound maktaduai 31 tling thei tur a ni thung.
A sum dawngtu Burnley lam thu hi a rintlak zawk a nih chuan British goalkeeper leina man bikah record fee a ni dawn a, record hmasa kum 2017-a Everton-in Jordan Pickford mana Everton hnena pound maktaduai 30 an chhunluh kha a khum dawn a ni.
City academy graduate Trafford hi July 2023 khan Clarets chuan pound maktaduai 19 kai chho thei turin an leichhuak a; season liamta khan Premier League-a kai chho leh thei tur khawpa chetha Scott Parker-a squad-ah player pawimawh ni phain, Championship game 45 a khelhah match 29 lai goal chhuah loh (clean sheet) a nei a, he division-a team of the year zingah a tel nghe nghe.
Kum 22 mi hian Burnley tan belhkhawmin game 73 a khel tling a; Etihad Stadium-ah hian kum nga daih contract a ziah bakah an remtih tlan chuan kum khat dang cham belh thei turin inremna ziah a ni a, number one shirt a ha ang.
Trafford hi manager Pep Guardiola hnuaiah khan fourth goalkeeper niin, a hmaah Ederson, Stefan Ortega leh Marcus Bettinelli-te an awm miau avangin khelhna ‘chance’ a vang hle!
City-a a kirleh hnu hian kum riat chhung teh meuh first choice dinhmun lo luah tawh Brazilian Ederson nen number one spot an inchuh dawn a ni.
Ederson hian Etiohad club-a a contract tawp kum a hmang mek a, Galatasaray nen sawizawm ni mah se thla hmasa khan chhuak tura sawina chu ‘99% fake news’ a nih thu puanzar a ni.
Tun thlengin Manchester City hian an keeper kum 31 mi lei tuma dawrtu an la hmu lo a, mahse, Trafford an sengluh hnu hian khelhna hmun chang lo German Ortega erawh a chhuah rinna a lian zual thung.
Trafford hian kum 2015 khan City academy zawmin, he hmun atanga ei tling chho hi ni mah se first-team tana khel lo zawngin Accrington Stanley leh Bolton Wanderers lamah loan-in an thawnbo a; a hnuah Burnley chuan leiin, match 73 a khelhsak zingah khan 2023-24 season Premier League match 28 a tel.
England tan under-17 atanga under-21 level khelin, kum 2023-a champion European Championship squad-ah khan a tel bawk a, goal khat mah a chhuah lo nghe nghe.
Nikumah a vawi khatna atan senior international khel tura kohna a dawng a, mahse, he level-ah tak hian ‘debut’ a la nghak chhuak zo rih lo.
Trafford hi tun nipui thawt chhunga City player lakluh parukna ni tawhin, a hma hian midfielder pathum Tijjani Reijnders (initial fee of £46.5m), Rayan Cherki (initial fee of £30.5m) leh Sverre Nypan (£12.5m)-te bakah left-back Rayan Ait-Nouri (£31m) leh Bettinelli (nominal fee) an lo senglut tawh bawk a ni.
Squad tichak turin January transfer window lai khan City hian player manah pound maktaduai 200 an lo seng tling tawh bawk.