Britney Spears-i’n Osbourne chhungkua a khak fak

Genre leh generation hrang hlak an ni a, an inkarah neuh neuh an nei tur pawha mi rinphak bak an ni, mahse, hei le, Britney Spears leh Ozzy Osbourne te boruak a chhe ta tlat.
Britney hian a Instagram-ah Osbourne chhungkua chu khawvela ninawm ber tiin, ‘khawngaihin lo ngawi chipcham teh,’ a ti siah mai.
An buaina intanna chu hmanni lawka ‘The Osbournes’ podcast epsiode a Ozzy-a’n TikTok a lam hrang hrang an sawihonaa Britney Spears lam a hmer tel vang a ni. Ozzy hian, “YouTube vela ni tin maia Britney Spears khawngaihtlak-i hmuh fo mai hi ka kham ta. A lungchhiatthlak tlat,” a ti a. A fanu Kelly Osbourne-i’n lo zawmin Spears a khawngaih thu a lo sawi ve leh a, an nu ber Sharon Osbourne pawhin, “Khawngaihthlak reuh mang e,” a lo ti ve bawk.
Britney Spears hi kum 13 chhunga mahni duh ang pawha awm thei lo tura court-in amah enkawltu ruata khuakhirh a nih hnuah 2021 atang khan a zalen ta a, tunnaiah social media lamah a thawmhnaw tawngchham tak tak nena a lam lai video en tur a awm thin a, hemi chungchang hi Osbourne chhungkua hian an rawn sawi chhuak a ni.
Britney hian Osbourne chhungkua a chhan letna a tihchhuah rualin a social media content avanga sawiselna chi hrang hrang tawk actress Kate Beckinsale tlavang a hauh tel nghal a, “Kate Beckinsale hi ka ngaina a, London khawchhuak a ni lehnghal a! A IG chungchanga a laka mite nunrawn theih zia hi ka hriatpui a, a chhan let dan pawh a tha khep khep e,” a ti.
Chutah ama chungchang sawi lehin, “Mahse, kei min comment dan thenkhat hi chu la chhe leh chhawng tak a ni, ka kum ang ang hian upa lutuk te min tia, IG lama ni tin lam reng mai te min ti bawk! Pakatnaah chuan ka lam zen zen bik lo…pahnihna ka rethei lo bawk! Ka ke zungpui veilamah hian he leia mipa emaw hmeichhia emaw zawng zawng aiin zia ka ngah daih zawk,” a ti.
Britney Spears chuan insawisel aiin intanpui tawn a pawimawh zawk tih sawiin, “Miin kan chungchanga ngaihdan an lo nei ve ringawt hi a hrehawm dan ka tawng tawh, a pawimaw zawk chu intanpui tawn hi a ni…Kate nen photoshoot kan ti ang a, Osbourne chhungkua khawvela mi khamawm ber te hi dawhthei takin lo ngawi chipcham rawh se,” a ti bawk.