Bruno Mars “I Just Might” a la Hot ber

Bruno Mars “I Just Might” a la Hot ber
Bruno Mars hla thar “I Just Might” chu Billboard Hot 100 (US singles) chart-ah a No.1 a, he chart-ah hian a zawnin kar hnih a No.1 tling ta. He hla hi kar kalta chart-ah khan No.1-ah a debut-in, Mars hla he chart-a No.1 kai thei 10-na nih rualin, a hla zinga he chart No.1 a debut thei hmasa ber a ni bawk. He hla hi February ni 27-a a tlangzarh tur, a album thar ‘The Romantic” atanga a lead single a ni.
Billboard Hot 100 chart hi kar khat chhunga US-a hla lar dan tehna niin, chart ranking siam nan hian all-genre US streaming (official audio leh official video), radio airplay leh sales data te chu tehna pawimawh a ni.
Bruno Mars “I Just Might” hian kar khat chungin streaming maktaduai 17.1, radio airplay ngaithlatu maktaduai 40.8 leh sales 9,000 a la nei thei a, hei hi a kar hnih nan chart-ah a No.1 pui leh ta a ni. Bruno Mars hla 10 he chart-a No.1 kai thei zinga hla pariat te chu kar khat aia rei an No.1 thei vek a, he chart-a a No.1 rei ber chu Mark Ronson a thawhpuina ‘Uptown Funk!’ kha niin, 2015 khan kar 14 a No.1 thei.
Olivia Dean “Man I Need” chu No.4 atangin No.2-ah a insawn a, he chart-a a tawn san ber a la ni. Taylor Swift hla hit, he chart-a kar 10 No.1 ni thei “The Fate of Ophelia” chu No.2 atangin No.3-ah a tawlh a, he chart-a kar riat No.1 ni thei KPop Demon Hunter soundtrack HUNTRIX “Golden” chu No.3 atangin No.4-ah a tawlh ta a, he chart-a kar 10 No.1 ni thei Alex Warren “Oridinary” chu No.5-ah bawk a la awm.
Ella Langley “Choosin’ Texas” chu No.6 a la ni a, sombr ‘Back to Friends” chu No.8 atangin No.7-ah a insawn leh hret a, Kehlani “Folded” chu No.9 atangin No.8-ah a insawn leh hret a, Djo “End of the Beginning” chu No.7 atangin No.9-ah a tawlh ta a, Taylor Swift “Opalite” chu No.2 atangin No.10-a a tawlh ta bawk.

Sia leh Sean Paul ‘Cheap Thrills’-in RIAA Diamond kai
Sia leh Sean Paul 2016 hla hit ‘Cheap Thrills’ chuan Recording Industry Association of America (RIAA) diamond certification a kai ta a. RIAA Diamond certification hi US-a album emaw hla emaw maktaduai 10 hralh tlin theih chhinchhiahna a ni a, Sean Paul tan RIAA diamond certification kai thei hla a neih vawi khatna a nih laiin, Sia tan a pahnihna a ni ve thung.
‘Cheap Thrills’ hi 2015 khan Sia hian a LP This Is Acting-ah telhin, a tlangzarh a, a hit nghal hle a, 2016-ah Sean Paul remix a rawn chhuak ve leh a, chu chuan rawn tilar lehzualin, Billboard Hot 100-ah No.1 kaiin, Grammy-ah pawh best pop/duo group performance category-ah nominate a ni zui a, Sia leh Sean Paul tan Grammy nomination an neih awm chhun a la ni ve ve bawk.
Sia hian 2024 khan a hla dang ‘Chandelier’ chu RIAA diamond a lo kaipui tawh a, he hla hi a tihchhuah atanga kum 10-naah chiah diamond kaiin, ‘Cheap Thrills’ pawh hi kum 10-ah bawk diamond a kai leh ta a ni.