BTS-in Guinness World Record an siam

K-pop group BTS chu Guinness World Records-in “Icon”-ah an puang a, Asian act zinga GWR-in ‘Icon’-a a puan hmasak ber an nih bakah musical group anga ‘Icon’-a puan awmchhun an ni bawk. Tunah chuan GWR ‘Icon’ huangah Taylor Swift leh Beyonce te nen an awmho ta a ni. BTS hi chart lamah an chetha par par hle a, Spotify-ah pawh an hla vawi tluklehdingawn 38 chuang stream a ni tawh a, khawvel huapa an huhang nat zia hei hian a tarlang chiang hleah GWR chuan an ngai a ni.
GWR hian an ‘Icons’ list-ah BTS an telh thu hi May ni 17 khan an puang a, Asia act zinga hetiang chawimawina dawng hmasa ber an nih pianah solo artist ni lo, group anga ‘Icon’ a puan hmasak ber an ni bawk. GWR ‘Icons’ list-ah hian khawvel huap pop culture a nghet taka huhang nei lian te hming tlar a ni a, rimawi lama legend Dolly Parton, Taylor Swift, Beyonce, Drake, Elton John leh Paul McCartney te nen GWR hian huang khatah an khung ta a ni.
GWR chuan BTS huhang nat zia sawi nan, “BTS i hre lo a nih chuan khawilai lungpui lian keh karah i lo khawsa bo ve mai mai a ni ngei ang,” an ti. Hetianga “Icons’ zinga telh hi an hlawhtlinna hrang hrang te thlir chuan an phu ve reng te pawh a tih theih ang. 2018 khan Billboard 200 (US albums) chart-a No.1 kai thei album ‘Love Yourself: Tear’ rawn neiin K-pop act zinga hetiang tithei hmasa ber an ni a, an hla hit ‘Dynamite’ chu Spotify-a Korean act zinga vawi tluklehdingawn stream kaipui thei hmasa ber an ni a, 2020 khan he mellung hi an thleng. 2024 khan Spotify chuan khawvel group zinga stream nasat berah an puang tawh bawk a ni.