BTS-in US-a No.1 kai thei album 7 nei ta

On Mar 31, 2026 53 0

BTS-in US-a No.1 kai thei album 7 nei ta
BTS album thar ‘ARIRANG’ chu Billboard 200 (US albums) chart No.1-ah a debut a, he chart-a an album No.1 kai thei pasarihna a ni. Hetihrual hian Luke Combs album ‘The Way I Am’ pawh top 10-ah langin, a top 10 album pasarihna a ni ve chiah bawk.
BTS member V, Suga, Jin, Jungkook, RM, Jimin leh J-Hope te hian Billboard 200 chart-a No.1-ah an album hmasa Proof (2022), BE (2020), MAP OF THE SOUL : 7 (2020), MAP OF THE SOUL : PERSONA (2019), Love Yourself ‘Answer’ (2018) leh Love Yourself ‘Tear’ (2018) te an lo kaipui tawh a, ARIRANG hi a pasarihna a ni.
Billboard 200 chart hi kar khat chhunga US-a album lar dan tehna niin, chart ranking siam nan hian album hralh tam dan chu tehna a ni a, album hralh zat chhut nan hian album tak tak hralhna bakah streaming atanga album hralhna tlukpui leh album-a hla a mala hralhna atanga album tlukpui te belhkhawm thin a ni.
ARIRANG hi kar khat chhungin US-ah 6,41,000 an hralh thei a, chung zinga 5,32,000 chu album tak tak hralhna niin, BTS album zingah kar khat chhunga album tak tak (physical album) hralh tam ber a la ni. Streaming atangin 95,000 (on-demand official stream maktaduai 99.10) niin, album-a hla a mala hralhna atangin 14,000 a tling thei bawk.
ARIRANG hi March ni 20 khan an tlangzarh a, album an tlangzarh rual hian Betflix special BTS THE COMEBACK LIVE = ARIRANG chu March ni 21-ah an tichhuak nghal a, he album atanga an leadsingle ‘SWIM’ pawh an tlangzarh nghal bawk. Thla thar atangin BTS WORLD TOUR ‘ARIRANG’ an tan nghal dawn a, April ni 9-ah Goyang, South Korea-ah tour an kickoff dawn bawk a ni.
Luke Combs album thar ‘The Way I Am’ chu 1,01,000 hralhin No.2-ah a debut a, he chart-a a album top 10 kai thei pasarihna a ni. ‘The Way I Am’ hi album tak tak hralh chu 23,000 niin, streaming atangin 76,000 (on-demand official stream maktaduai 77.66) niin, album-a hla a mala hralhna atangin 2000 a tling thei bawk.
ARIRANG leh The Way I Am te chiah hi tunkar chart-a album tlangzarh thar top 10-a lang thei awm chhun an ni a, top 10-a lang dang album pasarih te chu chart No.1 lo ni tawh vek an ni, No.1 ni lo awm chhun chu Olivia Dean ‘The Art of Loving’ niin, No.6 a ni.
Morgan Wallen “I’m the Problem’ chu 76,000 hralh lehin No.2 atangin No.3-ah a tawlh a, Harry Styles ‘Kiss All the Time. Disco, Occasionally’ chu 64,000 hralh lehin, No.1 atangin No.4-ah a tawlh a, Don Toliver “OCTANE’ chu 55,000 hralh lein No.6 atangin No.5 a kai thar ve leh thung.
Olivia Dean ‘The Art of Loving’ chu 54,000 hralh lehin No.7 atangin No.6 a kai thar leh a, Bad Bunny ‘DeBÍ TiRAR MáS FOToS’ chu 53,000 hralh lehin No.5 atangin No.7-ah a tawlh a, Bruno Mars “The Romantic”chu 45,000 hralh lehin No.8-ah bawk a la awm a, Morgan Wallen “One Thing at a Time” chu 38,000 hralh lehin No.12 atangin No.9-ah a kai thar leh ta a, KPop Demon Hunters soundtrack chu 36,000 hralh lehin No.10-ah bawk a la awm.