Buaina chhuah hna a vawi khat nan Manipur CM-in NH 37 zawh

Buaina chhuah hna a vawi khat nan Manipur CM-in NH 37 zawh
Manipur Chief Minister Y Khemchand Singh-a chuan a vawi khat nan lirtheia zin chhuakin MLA pariatte nen Inrinni khan Imphal atangin Jiribam district an thleng a, ni thum chhung tlawh tur niin NH 37-ah darkar li chhungin km 217 vela thui an tlan a, hei hi chi leh chi buaina karah remna leh inrintawnna a awm theihna tura hma a lakna a ni.
An kawngpui zawh hi Kuki tamna, Kangpokpi district paltlang a nih avangin Meitei leh Kuki chuan an hnam inkara buaina chhuat atang khan he kawng hi an zawh ta mang lo va. Chief minister hi state BJP hotu A Sharda, MLA T Robindro, H Dingo, Sapam Ranjan, S Premchandra, Noorul Hassan, Sapam Keba, Kongkham Robindro leh L Rameshwore te an ni a. February thla khan Singh-a hian helicopter-in district hi a lo tlawh tawh bawk.
CMO-in thu a chhuahah chuan sorkar hotute hi buaina avanga mahni in atanga tlanchhe mek, internal Displaced persons (IDP)-te nen pawh an inkawm dawn tih sawiin khawtlanga pawl hrang hrang, a bik takin Meitei leh Kuki-Zo hruaitute nen pawh an thukhawm dawn a ni.
Jiribam district-a Ningshingkhul-a damdawi in a tlawhnaah Singh-a chuan district hospital-ah thawktu tha ber an awm theihna nan thawktute sawnna tur siam thuai a nih tur thu a sawi bawk.
June, 2024 khan khatih laia chief minister, N Biren Singh-a khan NH-37 zawhin Jiribam hi tlawh a lo tum tawh a; mahse, Kangpokpi district-a Kotlen bulah hel nia rinten hmahruaitu venhim hna thawktute an beih avangin a kaltlang ta lo.
Tar lan tawh thin angin Manipur-ah hian tlangrama cheng, Kuki-Zo leh an khawpui, Imphal leh a hnaih phaizawla cheng Meitei inkarah May, 2023 atang khan buaina a chhuak a. Tun thlengin mi 260 vel thi awm tawhin hnam hnih zinga mi sang tel buaina avanga tlanchhia leh baihvai an awm.
Tun thlengin inremna la nei lo mah se tharum thawhna erawh a tam lutuk tawh lo va, boruak erawh a la tang em em reng a ni.