Buaina thlentua Manipur CM hlui puhtu awm belh

Manipur chief minister hlui, N. Biren Singh-a chuan beihna dang, sawi hlawh tak tur a nei thar leh ta a. A thawhpui thin ngeiin Manipur tichhetu-ah a puh.
Singh-a puh chhetu thar hi a thawhpui hnai tak thin, Bharatiya Janata Yuva Morcha (BJYM), Manipur president hlui, Monoharmayum Barish Sharma niin chief minister hlui chu an state-a buaina chhuahna bul ber niin a puh a ni.
Social media-a video darh nasa takah Barish Sharma-a chuan khaw veng himtu zinga man hmasak ber tur a nih thu leh Singh-a thupek hian hna hautak tak tak a thawh thin thu a sawi a. Wangkhei Ningthem Pukhri Mapal-a a chenna ina Meira Paibi nen an inbiaknaah, “Biren-a hian Manipur a tichhia,” tiin a au chhuak a ni.
He thil hi Thawhtanni chhun lai vela thleng niin Bishnupur district-a Kumbi-a mite nia hriat Meira Paibi member-te chu Barish Sharma inah hian an pungkhawm a. Nuho hian social media-a Barish Sharma-a thu tar lan duh lohna an lantir a, Febnruary 12-a sit-in protest an huaihawtah khan a tel apiangte hnenah Rs. 500 pek an ni tiin a tar lang a ni.
He a thu tar lan hi Meira Paibi member thenkhatten an haw hle a, a puhna hian a tina hle niin an sawi a. Hemi chungchangah hian a inah an kal chilh a ni.
Manipur chief minister hlui, Singh-a hi an state-a hnam hnih intihbuaina a chhuah atanga kum hnih dawn hnuah February 9 khan a bâng a. Intibuai zinga pakhat, Kuki chuan buaina chhuakah hian lehlam, Meitei lam a tang bik niin an lo sawi tawh thin.
Kuki pawlte chuan Supreme Court-ah audio pakhat put ru behchhanin buaina tipunluntua puhin a lakah petition an thehlut mek a, court pawh hian audio-a aw lang chu Singh-a ngei a ni em tih finfiahtir tumin mi thiamte a rawn mek a, report an siam hunah a ngaihtuah chhunzawm dawn a ni.