Buaipui manhla lo tak a ni em?

India rama hausa berin kum sawm zet an buaipui a, harsa an ti ve hle niin a hriat. Tunah chuan an thlawn dawn ta a, anni meuh pawhin an beidawnpui a ni maithei ? Mai par thlawna thlawn fai vek erawh an la tum bik lo niin anmahni’n an sawi.
2010 atang khan Reliance chuan sum hlawm thawhin All India Football Federation (AIFF) a thawhpui a, December 8 khian kum 15 chhung an thawh dunna tawpin inremna an siam zui ta lo.
Reliance hnenah hian AIFF chuan football league din phalna a pe a, 2014 atangin kalphung thar leh hautak Indian Super League buatsaih tan a ni. Reliance chuan football enkawl tur hian company pakhat Football Sports Development Limited (FSDL) a din a, anni hian ISL leh AIFF nena an thawh dunna hrang hrang an kengkawh a ni.
ISL an kalpui atanga season sawmna 2024-25 a zawh thlengin FSDL chuan Indian football avangin cheng vaibelchhe 5,000 vel an hloh tih an puang a. Hetih chhung tho hian chawhrualin ISL club pakhatin kum tin cheng vaibelchhe 30 atanga 35, kum sawm chhungin cheng vaibelchhe 330 atanga 350 vel an hloh niin an chhut bawk.
Chawikan an tum ber Indian football-in san lam a pan em tih chu zawhna chhan chakawm loh tak a ni thung. Tunah hian FIFA ranking-ah India chu 133-na a ni a, December 2016 hnua a hniam lai ber niin ISL hlutna pawhin hmasawn lam a pan meuh lo niin a hriat.
Season hmasa ber 2014 khan chawhrualin a hmunah mi 24,357-in en ziah ang an ni a, Asia mai ni lovin khawvelah a tawng sang nghal hle. Mahse, season liam ta 2024-25 chhungin mi 11,578-in a hmuna en ziah ang an ni ve thung a, Mohun Bagan leh East Bengal tel lo phei se a ngaihtuahawm viau thei dawn a, season hmasa ber nen khaikhinin a pum puia entu 47.53%-in a tla hniam tho. Hyderabad-in 3-1-a an mikhual Punjab an hneh loh tum, March 6, 2025 khan a hmunah mi 350 chiahin an en!
FSDL hian season tinin ISL buatsaih nan cheng vaibelchhe 60 vel an seng niin an tar lang a, AIFF hnenah kum tin cheng vaibelchhe 50 an pe tel ziah bawk. Chuti chunga Indian football-in hma a sawn loh dan an hmuhin kum 15 kal ta vela an khawthlir kha a tak ram a chang lo nasa ve viau maithei ? India ramah hian football hmanga huang zauha thuk zawka bu khuar a harsa ve hrim hrim te pawh a ni mahna?
ISL avanga FSDL-in sum an hloh zat hi Mizoram atang chuan a maka maka tam a ni ringawt. Pawisa kum kal mek 2025-26 chhungin Mizoten kan hmachhuan ber Mizoram sorkarin sports budget atan vaibelchhe 27.3835 a pawm a, hetiang zat hi kum tin sports budget-ah nei ziah ila, kum 182 leh thla ruk velah vaibelchhe 5,000 a tling chauh dawn!
FSDL-in sum tam tham sengin ISL a buatsaih zui tawh dawn lo a, AIFF kutah Supreme Court chuan dahin sumdawnna lama thawhpui thar neih tumin hma a la mek a, October 15-ah tifel hman tura ruahman niin sum hlawm thawh thei an awm lo a nih chuan anmahni ringawtin ISL an huaihawt thei si lo. FSDL anga sum phawrh hnem thei hi thawhpui tur a hmu ang em?
Ziaktu : Thang Khuma (T-a)