Pathianni zing khan NBA Cup semi-final khelh a ni a, Atlanta Hawk hnehtu Milwuakee Bucks in final an lut a. Houston Rockets paltlanga final lut Oklahoma City Thunders nen final-ah an inhmachhawn ang.
Eastern Conference semi-final ah Milwuakee Bucks leh Atlanta Hawks te an inhnehtawk viau a, quarter tinah an insan chhawk zak zak. Quarter khatnaah Hawks in bul an tan tha a, point hnihin chungnung zawkah an tang. Quarter hmasa berah hnufual zawk ni mah se Bucks an insiamtha thuai a, quarter hnihnaah point 8 in an chungnung zui ve leh a, point ruka hmahruai chungin chawlhlawk an hmang.
Chawlhlawk hnu lamah Hawks in bul an tan tha nawn leh a, quarter thumnaah point sarih laiin an chungnung a, point khata hmahruai chungin quarter hnuhnung ber an hmachhawn. Chak zawk nih ngei tuma an inawr tawn zak zak hnuin quarter hnuhnung berah point kua ngawtin Bucks an chungnung a, point 110-102 a hnehna changin final an lut ta a ni.
Hawks hnehna final an luh theih nan Milwuakee Bucks tan Giannis Antetokounmpo a khel tha viau a, point 32 a thawhchhuah bakah ball sawhlet vawi 14 ngwt a dawng. Bucks tan hian Damian Lillard chuan point 25 a thawkchhuak a, Brook Lopez chuan point 16 a thawkchhuak bawk. Atlanta Hawks tan hian Trae Young chuan 35 a thawkchhuak a, assist vawi 10 neiin, ball sawhlet vawi 14 zet nei bawk mah se an team tlawm tur a chhanhim zo ta chuang lo.
NBA Cup final a Milwuakee Bucks hmachhawn tur Oklahoma City Thunders chuan semi-final-a an khingpui Houston Rockets chu point 111-96 in an hneh a, final an lut. Thunders tan hian Shai Gilgeous-Alexander chuan point 32 a thawkchhuak. NBA Cup hmasa berah Milwuakee Bucks hian semi-final lut mah se final an lut zo lova, 2024-ah final an lut ta a, champion ngei tumin final-ah tan an khawh ang.
Bucks in final an lut
Get real time updates directly on you device, subscribe now.
Prev Post
Next Post