Budget-a tel vbch 1137 awmna zawt
Mizoram budget-a telh leh pass tawh cheng vaibelchhe 1137 hmanna sawi tur la awm lo chu a awmna hrilh turin MNF hruaitu Er. Lalrinawma chuan sawrkar a zawt.
Zirtawpnia MNF office Mizo Hnam Run inkhawmah MNF general secretary Er Lalrinawma chuan sawrkar kum liamtaa budget-a pass tawh, hmasawnna hnathawhna tur sum hman loh nia lang hi sawiin, 2024- 2025 a Mizoram hmasawnna hnathawhna tur, capital expenditure hnuaia ‘other capital expenditure’ atan cheng vbch. 1209.7 (BE) ruahman a nih laiin, vbch. 72.04 chauh hmanral niin revised estimate-ah a lang si a. Vbch. 1137.66 hi hman loh nia a lan thu a sawi
“Budget-a sum beisei hi an hmu pha lo nge ni, an ti lapse zawk? Hetiang taka ram leh hnam hmasawnna tura sum tam tham hman loha a awm hi, a chhan dik tak mipui min hrilhfiah turin kan beisei a ni,” a ti.
He sum hman loha lang hi Mizoram budget ‘capital expenditure’ (2024- 2025) pumpui vbch. 2455.08 atanga chhutin za zela 46.3 a tling pha hial tih a sawi bawk.
Jordan Center Sethawn leh PAHOSS chungchangah Er Lalrinawma chuan, “Kan ram tana thil tangkai tak an nih lai a, ruahmanna dang awm chuang si loa tihtawp a ni mai hi a pawi hle,” a ti.
Budget-a tel vbch 1137 awmna zawt
Get real time updates directly on you device, subscribe now.