BUDGET LEH HOUSE

ZD Lalvunga

India Constitution hian State Budget chungchang a khawih tam lo hle a. Article 202 atanga 209 hian Budget leh State sum thu a sawi hlawm a. Article 208 nain a phalsak angin “State hrang hrang ten an state chhunga Budget an buaipui dan tur a siam thei ang” an tih angin keini pawhin, “Rules of Procedure & Conduct of Bussiness in Mizoram Legislative Assembly” ah Rules 143 atanga 159 hi kan siam ve a, India Constitution leh kan Mizoram Rules-a kan tana pawimawhte hi thlir thuak teh ang.
India Constitution Article 203-na chuan “Expenditure charge upon the Consolidated Fund of the State” atan sum ruahman chu House-ah MLA ten an Vote” a ngai lova, sawiho erawh chu phal a ni, tih a sawi a, chutianga “Expenditure charge upon the Consolidated Fund” chu Governor hlawh leh enkawlna te, Legislative Assembly Speaker/Dy. Speaker hlawh leh enkawlnate, High Court-a thawk thenkhatte hlawh leh enkawlna te, leh MPSC sum hman turte hi a ni.
Tin, Rules of Prosedure & Conduct of Bussiness in Mizoram Legislative Assembly-a Rule 144-na chuan Budget (Annual Financial Statement) hi House-a put luh a neih niin sawiho a phal lo.
II. Rule 147 (I) chuan Speaker-in sawiho ni tur a tuk/ bithliah chu Budget pharh a nih atanga ni 2 aia hma lovah, chauh Budget hi sawiho hi a phal a ni.
III. Rule 148 leh 149 – hian “Cut Motion” hmanga Budget ami Department grant- sum ruahmanna duh loh vanga sum paihsak dan a sawi a, ‘Cut Motion’ chi hrang hrang, “Disapproval of Policy Cut” te, ‘Economy Cut’ te a hrilhfiah hlawm a ni. Rules 150 atanga 152 hian Speaker-in Cut Motion-a pawm theih dan leh a hnawl theih dan a rawn sawi leh a ni.
IV. Rule 155-hian Supplementary Demands-sawiho a nihin a tira sum neih (Original Grant) emaw a policy emaw sawi a phal lova, a belhna (Supplementary Demands) lai chauh sawi a phal a ni.
V. Estimate Committee- hi a dah lal phian mai a Rule 143 (2) chuan Estimate Committee in Finance Minister hnenah rawtna a lo siam a, chungte chu tul a tih anga Finance Minister a ngaihtuah hnu-ah Budget chu House ah a pharh ang a ti a ni. Estimate Committee hian Budget chungchangah rawtna te hi a lo nei tawh thin em?
VI. Rule 148-na vek hian hetia Budget Grant sawiho a nih hian a ti tlem tur zawnga “Cut Motion” an neih a nih loh chuan tih danglamna (Ammendment) Motion put luh reng reng a phal lo a ni.
Kum 1994 laihawl vel khan (ka hriat sual loh chuan) Mizoram Legislative Assembly-a MLA ten lungsi taka March thlaa Budget an passed kha Budget hmel danglam dawrh khawpin leh, a bu-a siam tham teh meuhin, Finance Department khan a sawp dang lam a. House-ah zawk pawh hian, Budget chungchanga lungawilohna entirnan, “Cut Motion” te a nih law law loh chuan Budget Grant- sum kan tihdanglam (Amend) tura ‘Motion’ put luh takngial pawh an phal lo chu a ni si a. Khatiang ang thil te kha engtia sawi fel tur chu nge ni ta ang maw le? Financial Control, satliah ni lovin, hetia sum an hlehsak te hi sum nei lo hlen tur niin an tarlang leh nghal bawk si a, tu thluak tak chu ni ang maw le?
Note :- Kan hriat tur leh zawm tur chu, “Cabinet Meeting” hi a ni. Minister nazawng ni lo Cabinet Minister, Meeting-ah chuan, ram tana thil pawimawh sawiho a ni a, Meeting-a thuchhawp chhuah azirin, Cabinet Memorandum a awm ngei tur a ni, Memorandum pawh nei lo Cabinet Meeting hi, thil atthlak a nih hi hriat a tha. Sorkar thar hian, Cabinet Meeting-ah Memorandum nei lova Meeting an neih kha sim teh se, State dang ten an hre palh ang tih a hlauhawm a nia!! Cabinet Meeting Secretary hi Chief Secretary an ni zel tih kan hriat theuh a rinawm.