India mipuite chuan Modi sorkar chu term thumna chelh turin hneh takin an thlang tling a ni, tiin President Droupadi Murmu chuan Parliament joint sitting-ah a sawi.
President chuan Jammu and Kashmir mipuite hnenah pawh tun hnaia Lok Sabha inthlanna neihah vote an thlak that avangin lawmthu a hrilh bawk a. Election Commission-in khawvela democratic exercise lian ber hlawhtling taka an kalpui avangin lawmthu a sawi bawk.
MP tharte lawmpuina a sawiah Murmu chuan India mipui te aiawhin an mawhphurhna an hlen a beisei thu a sawi a.
“Tun inthlanah Jammu and Kashmir atangin thil lawmawm tak a chhuak a ni. Kum sawm tam voting records te chu khumin a awm,” a ti a.
“Tun hnai kum sawm li chhungin Kashmir-ah strikes leh shutdown te avangin vote tlemte chauh a tla thin a. India hmelmate chuan vote tlachhia chu global stage-ah Jammu and Kahsmir mipuite opinion a ni tiin an thehdarh thin. Tunah erawh chutiang mite thil sawi chu Jammu and Kashmir mipui ten an phutawkin an chhang ta a ni,” tiin a sawi.
Murmu chuan khawvelin kum 2024 inthlan chu an sawi nasa a ti a. “Khawvelin Indians ten sorkar ngelnghet tak a tum thumna atan an thlang tih an hmu a ni,” a ti a. “Chu chu kum sawmruk hnua a thlen leh chauhna a ni a. Mipui ten ka sorkarah a tum thum nan rinna an nghat a ni. India mipuite chuan ka sorkar-ah chauh an duhte tihhlawhtlinin a awm tih an hria a ni” tiin a sawi.
“Ka sorkarin kum 10 chhunga service leh governance tha tak a kalpui nemnghehna a ni,” tiin President chuan a sawi bawk.
-- Advertisement --
‘Emergency kha Constitution beihna leh chapter thim ber a ni’
President Murmu chuan kum 1975 a Emergency puan kha ‘constitution beihna leh hun thim ber a ni’ tia sawiin khang thil duhawm lo tak karah India chuan hnehna a chang chho zui a ni, a ti.
Constitution siam a nih lai khan khawvela thiltithei ten India chu a hlawhchham an beisei a. Constitution hman a nih hnuah pawh Constitution beihna nasa tak a thleng a ni, tiin a sawi bawk a.
“Vawiin 27th June ah hian June 25, 1975 a Emergency puan khan Constitution beihna hun thim ber a ni. Ram pum a thinrim a. Mahse, ram chuan chhung harsatna te chu a paltlang a ni,” tiin a sawi bawk.
President-in Emergency chungchang a sawi lai hian opposition member-te ah bengchheng siam an awm thung a. Mahse, Murmu chuan leader hminghmerha sawi a nei lo thung.
Budget thar pharh turah hmalakna liantham tak a awm dawn tiin President chuan a sawi bawk a.
Parliament session neih lehah Budget pharh ni dawnin budget chu hmathlir tha tana document pawimawh a ni ang tiin a sawi bawk.
“Budget-ah major economic leh social deicsion lian tham a awm ang a, chhinchhiah tlak tak tak hmalakna a awm dawn a ni. Mipuite duhdan phuhruk nan reforms chak taka kalpui a ni ang,” tiin a sawi bawk.
A sorkar chuan State te chu investment thilah hrisel takin intlansiak se a duh a ti a. “Chu chu competitive-cooperative federalism spirit a ni,” tiin a sawi bawk.