Mizoram budget 2023- 2024 pharh tak an zirchianin, mipui chanvo tur a tlem tual tual a, sawrkar sum leiba a pung tulh tulh tih chu an ngaihdan a ni tih Congress Thalai chuan an sawi.
Congress Thalai Hqrs. thuchhuak chuan, budget thar chu mipui tan lawmna tur a awm lo mai niloin, nitin khawsakna a harsa chho hle zawk tur chu pawi a tih thu sawiin, finance enkawl thiam leh mi dik, Pu Lalsawta chief minister hun a nghahhlelh awm hle tih a sawi. ‘Budget tharah zaa 77.89 hi sawrkar hnathawk hlawh leh inrelbawlnaa hman tur a ni a, mipui tan zaa 22.09 chauh a ni ang. Hetiang a nih chuan sawrkar hnathawkten a hun taka hlawh an lak loh chuan engkim a buai fo dawn tihna a ni a. Cheng vaibelchhe 640.01 indaihlo sa tura pharh a ni leh, budget tharah vbch. 272.33 puk belh chung pawha kumtawpa vbch 628.51 indaihloh sa tur hi a vanduaithlak,’ a ti.
RBI tarlan danin Mizoram chu India state zinga leiba nei hnem ber a ni tih a sawi a. 2019 ah 34.9%, 2020 42.6%, 2021 ah 56.7%, 2022 (RE) 55.7%, 2023 (BE) 53.1% a nih laiin, finance changtu chief minister Pu Zoramthanga’n Assembly Session-ah leiba a engto vak loh thu a sawi chu ram siamthat tumna tak tak a neih loh zia lanna niin an hria thu a sawi. Sum enkawl thiam loh avanga mipuiin harsatna kan tawh thinah Covid 19 chhuanlama hman thin pawh mipui bum tawh lo turin Mizoram sawrkar hotute an chah tih a sawi a ni.
Budget 2023- 2024 chu budget awmze neilo leh mipui beidawnna thlentu tur mai a ni tih chu Congress Thalai pawm dan a ni, tiin, ‘Minister te pawhin hnathawhna tur sum an department-ah engmah an nei loa, chief minister tlawn thiam leh tlawn peih, a lang lo lama share pe tam thei minister/MLA apiangte chet theihna tur budget a ni a. Mizoram sawrkar hmalakna liantham zawng zawng hi central scheme-ah chauh a innghat dawn tih hi kan rin dan a ni.
Budget tharah mipui chanai a tlem – Congress Thalai
Get real time updates directly on you device, subscribe now.
Prev Post
Next Post