Buh leh thlai thar chhuah lam buaipuitu department-ten zirho

Buh leh thlai thar chhuah lam
buaipuitu department-ten zirho
Food, Civil Supplies & Consumer Affairs (FCS&CA) department hmalakna in ‘Strengthening of Price Monitoring Scheme’ tih thupuia hmangin workshop neih a ni. Sawrkar laipuia Department of Consumer Affairs director Lalramdinpuii Renthlei chuan a hmanpui.
Hmanpuitu hian thil man sang vak vak tur venna atana price monitoring pawimawhna, department hrang hrangin thil man an collect zingah pawh Department of Consumer Affairs-in thil man an collect chu sawrkar laipuiin a rin ber, sawrkar policy siam leh duanna atana a hman ber a ni thin tih a sawi a. Tunhnaia India leh Pakistan buaina avangin sawrkar laipui chuan nasa lehzuala ram puma price monitoring uluk leh ngawrh zawka kalpui a tum dan a sawifiah a ni.
Department of Consumer Affairs statistical officer Sandeep Kumar chuan ‘Price Monitoring Methodology’ tih thupui hmangin powerpoint presentation a pe a. District hrang hranga thil man collect thintu data entry operators-ten thil man collect chungchanga an harsatna tawh leh a chinfel dan tur sawiho a ni.
Mizoram sawrkar Agriculture & Farmer’s Welfare deputy directorate R Lalramhluni’n ‘Possibility of Production of Pulses in Mizoram’ tih thupui hmangin paper a present a. Mizoramah hlawk zawka pulses (dal) tharchhuah dan tur sawi a ni. Agriculture & Farmer’s Welfare department atangin tunhnaiah India sawrkarin ‘Self-Sufficient in Pulses Production’ tih thupuia neiin pulses production lamah tan a la nasa a, Mizoramah pawh tunhnaiah Tur/Arhar dal nasa zawk leh hlawk zawka tharchhuah theihnan state sawrkarin hma a la mek tih a sawi a ni.
Horticulture additional director Lalhmingmawia Pachuau chuan ‘Status & Prospect of Ginger Production in Mizoram’ tih thupui hmangin paper a present a. Sawhthing chu Mizote chauh ni lo, India ram leh khawvel pum ang pawhin spices zingah ei (consume) nasat ber pawl a ni, tiin, tunhnaiah sawrkar hmalakna in Mizoramah loneituten nasa takin sawhthing an thar a, heng sawhthing tharchhuah hi loneituten hlawk zawka an hralh theihnan state sawrkar leh sawrkar laipuiin thawhdunna tha an neih a pawimawh tih a sawi.
Departments pali – FCS&CA, Agriculture & Farmer’s Welfare, Horticulture leh Economics & Statistics hotute bakah district hrang hranga district civil supplies officer leh district tina price monitoring buaipuitu data entry operator-te an tel a ni.