Buhfai-ah manganna tur awm rih lo

Mizoramin ni tin mamawh thil hrang hrang a lakluhna kawngpui a chhiat em avangin a phurtu lirthei an tlan hlei thei lo a, hei hian mipui a nghawng mek. Buhfai erawh sem tur a awm a, manganna tur a awm rih lovah ngaih a ni.Food, Civil Supplies & Consumer Affairs department hotute chuan buhfaiah harsatna a awm rih loh thu an sawi a, lak khawl sa a awm thu leh kawng chhiain buhfai bikah harsatna a thlen rih loh thu The Aizawl Post an hrilh.
Kawng chhiaah hian buhfai phur lirthei an tang ve tho a, mahse lak khawl sa a awm thu, tuna godown hrang hranga mi hian tun thlaa Mizoram mamawh tur chu a daih thu te an sawi.
Kawngah hian buhfai phurtu lirthei tang an awm nual a, quintal sing vel chu kawngah hian a tang mek nia an hriat thu leh, tang mekte pawh hi an tlang ve zel an beisei thu, tlang an awm ve zel thu te an sawi.
Food, Civil Supplies & Consumer Affairs department-in an chhinchhiah danin, September ni 17 thleng khan Mizoram hmun hrang hrangah buhfai (stock) quintal 102035.60 a awm a, hei hi tun dinhmun bik atan chuan a tlem lo an ti.
Tun thla atan chuan a tlem lo a, tun thlaah ration buhfai hi sem a ni tawh bawk. Mahse thla thar atan chuan mamawh belh a ni ang a, chumi-ah chuan kawng pawh a lo \ha tawh ang tih an beisei thu an sawi.
Thla thar atan pawh hian a \ul a nih chuan Mizorama FCI-in buhfai an dah khawl sa a rin theih dawn tih an sawi bawk a, chuvangin buhfai lamah chuan manganna tur a awm rih lovah an ngai.