Buhfai supplu-tu thlan dan sawirik leh dan a inang lo – Dr Lalmalsawma

Sawrkarin ration buhfai supply-tu a thlan danah an chhuanlam a inang tawh lo niin Congress treasurer Dr Lalmalsawma Nghaka chuan a sawi.
Zirtawpnia Congress Bhavan-a inkhawmah Dr Lalmalsawma chuan, sum inrenchem tih leh ZPM inhmeh loh zia chu tunhnaiah miten an sawi nasa a. Hetah hian ZPM hotute sawrkara a fawngchelhtute chhia leh tha hriatna an hmansual vangah a ngai tih a sawi.
Buhfai supply-tu thlan danah sawrkarin austerity measure an lak loh zia a chiang hle tih sawiin, a chhang hniam ber RL Store-in quintal-ah Rs 3400.50 in a chhang a, quintal-ah Rs. 3550 a chhangtu LZ Juice hnenah an pe ta zawk a, hei vang hian kumtin cheng nuai 790 dawn sawrkarin a sen belh dawn niin a sawi.
“An chhuanlam pawh a inang ta lo reng reng. A thenin a hma in MAMCO pawhin an hlawhchham pui avangin RL Store hian an tithei chuang loang, tihte a ri a. MAMCO-in an tih theih loh vang khan engvangin nge a chhang hniam an tawrhtir ringawt? RL Store hian vawiin thlengin ka supply thei an ti. Kei pawhin ka bia a, supply thei lo ila eng vangin nge kan chhan ang, an ti a ni. Chhuanlam dang pakhatah an buhfai supply a quality a chhia, grade A ni loin grade C a ni, an ti a. RL Store chuan vawiina an supply mek leh kan buhfai supply tum kha khaikhin rawh se, kan buhfai a tha zawk a ti,” MPCC treasurer hian a ti.
Sum inrenchema an hlawhchham chhan chu eng dang a ni loa, entawn loh tawp tur MNF sawrkar kalta tih dan an entawn vang a ni tih a sawi. Harsatna sukiang turin sawrkar hmasa te puh loin, mahnia tih ve mai kha hruaitu tha tih tur a ni, tiin, “Mipui harsatna sukiangtu ni turin ram hruaitute hi an intihhniam a ngai. Congress party chuan mipui hamthatna kan thlir hram hram thin a, a chhe lai siamtha turin theihtawp kan chhuah thin. Kum 2018 ah khan Congress hi sawrkar chhunzawm ta ila, tuna kan sawi nasat em em skywalk leh ropeway hi a hlawhtling ngei ngei ang,” a ti.
Enchhin sawrkar, kalphung thar sawrkar kan tih chuan mipui a tibeidawng hle Congress hruaitu hian a sawi a. Sawrkar kalta ten an tih ngam loh tur an rawn ti chho mawlh mawlh niin a sawi bawk.