Bulls in Lakers an lehthal

March 28, Zirtawpni zing khan NBA regular season khelh chhunzawm a ni a, Chicago Bulls chuan Los Angeles Lakers an lehthal a, hnehna hlu tak an chang. Inkhel dangah Oklahoma City Thunder an khel tha chhunzawm a, hnehna chang lehin NBA season khata an chak tam ber hun duhawm an tawng.
Player ropui LeBron James leh Luka Doncic te khelhna Los Angeles Lakers hian Chicago Bulls lakah an khel tha a, quarter khatnaah point 10 zeti an chungnung nghal. Bul tan tha viau mah se quarter hnihnaah an khel tha lova, point 9 in an hnufual ve thung. Quarter hnihnaah khel tha lo mah se point khata hmahruai chungin chawlhlawk an hmang tho thung. .
Quarter hnihnaah hnufual zawk ni bawk mah se LA Laker hian chawlhlawk hnu lamah bul an tan tha leh viau a, quarter thumnaah point 15 zetin an chungnung leh ta mai a. Point 16 zeta hmahruai chunga quarter hnuhnung ber an hmachhawn vangin LA Lakers hi chak ngei tura ngaih an ni hman.
Chak turin LA Lakers dinhmun chhe viau mah se quarter hnuhnung berah Chicago Bulls in thil mak leh ropui an thlentir tlat thung. Point 16 zeta hnufual tawh Bulls hi quarter hnuhnung berah point 18 zetin a chungnung ta mai a, an khingpuite hi point hnihin an lehpel chiah chiah a, inlehthalna lian an thlentir a, LA Lakers lakah hian point 119-117 in hneh an chang zui ta a ni.
LA Lakers an hneh tum hian Bulls tan Josh Giddey a khel tha viau a, point 25 a thawkchhuak a, ball sawhlet vawi 14 zet a dawn bakah assist vawi 11 a nei tling bawk a. Season kal meka a vawi nga nan triple-double a puitlin. Bulls tan season khata triple-double puitlin tam ber dawttu a ni thar a. A chungah hian 1988-89 season-a triple-double vawi 15 zer nei Michael Jordan a awm.
Zirtawpni zinga inkhel dangah season kal meka khel tha tak Oklahoma City Thunder chuan an khingpui Memphis Griezzlies chu point 125-104 in an hneh. Griezzlies laka an chak si season kal mekah vawi 61 an chak tlinna chiah a ni a. NBA season khata an chak tam ber record thar an siam hial a ni. Thunder tan hian Shai Gilgeous-Alexander a khel tha viau a, point 37 a thawkchhuak.