Bundesliga table lera insawhnghet Bayern

Nilaini zanah singa fai ngawta an mikhual Hoffenheim sawpin Bayern Munich chuan Bundesliga table-ah point li bawkin hma an hruaifal leh ta.
He inkhela goal khat thawhtu England captain Harry Kane chuan Bundesliga top scorer a nihna sawhnghet bawkin, season kal laia he division match 15 a khelh tawh atangin goal 16 a khawl tling tawh a, assist vawiriat nei tling bawkin, Bundesliga goal 24-ah inrawlhna a nei.
Allianz Arena mipui 75,000 hmaah pawh khan minute 26-ah penalty atangin Bayern goal thumna a chhuihlut a; he penalty pawh hi a hlawhchhuah tho niin, a tauhluh tur ngei ngeia lang chu lehlam pawl defender-in a banin a lo dansak a, spot-kick atangin keeper tluk lohna lamah a thun.
Kum 31 mi ni ve tawh Kane hian a hmain minute 12-na leka defender Raphael Guerreiro goal tur chu one-two mawi tak hmangin a lo chhawpsak tawh bawk.
Manchester City forward hlui Leroy Sane chu Bavarians goal hmahruai khungtu niin, half-time hnu lawkah Sane bawk hian a goal hnihna leh Bayern goal lina ni bawk a thawh leh a; an goal ngana chu minute 66-a Serge Gnabry tihluh a ni thung.
Bundesliga leaders Bayern Munich hian first half minute 19 chhungin goal thum an ngah hman a; point 42 hum chungin Bundesliga table-a an hmahruaina an tichhah leh hret a, Thawhlehnia sikhat faia Mainz 05 hnehtu champion lai Bayer Leverkusen lakah point li bawkin an sang leh.