Bungraw phurluttu hnamdangten Traffic Police nena buaina thlen

Bungraw phurluttu hnamdangten
Traffic Police nena buaina thlen
Mizorama bungraw phurluttu hnamdangten tawnga inhriat pawh tawn loh leh an bungraw phurh an dahna tur hmun leh a pan dan tur an chian loh thin avanga harsatna an tawh thin thu Mizoram sumdawng pawl hnenah an thlen a. Hetiang nikhuaa Traffic Police nena buaina an tawh thin dan an sawi bawk.
Mizoram Merchant Association (MIMA) leh All India and North East Transporters ho chu Zirtawpni khan MIMA office-ah an thukhawm a. Transporter-te hi hnamdang an ni tlangpui a, Mizo tawng thiam loh nen loading and unloading-ah buaina an tawk fo a. An customer-te bungrua an deliver-na kawnga an harsatna tawh an sawi.
Bungrua an dahna lamah traffic police nen buaina an tawh fo thin chu MIMA hnenah an thlen a. MIMA chuan transporter-ten an customer-te hnena bungrua an deliver in, kawng zau lai thlan theih hram nise, traffic-ah buaina an nei a nih chuan an customer-ten biak sak theih nise, traffic police duty-te pawhin a theih chinah lo ngaihnathiam turin MIMA chuan a ngen nghal tih a sawi a ni.
MIMA hruaitute hian sawrkar leh NHIDCL chu NH 306/06 Aizawl to Silchar kawng siamtha tura an lo ngen thin chuan awmzia nei loin, fur a lo thlenin bungraw phur lirthei tana himlo khawpin kawng a chhe leh thin tih an sawi a. Thawh dun a tul zia sawihoin, a bikin kawng chhe chungchangah tun atanga sawrkar leh NHIDCL-in nakum furpui thlen hma ngeia Aizawl to Silchar kawng hi tha taka siam tura ngen nise an ti. Chutianga hma lak a ni chunga kawng hi a chhe leh a nih chuan, fur chhunga bungrua phurh luh loh hiala hma lak ho nise an ti. Hetiang a thlen lohnan sawrkar leh NHIDCL pawhin tun atanga hma la a, kawng siam hna hi thawk reng turin an ngen tih an sawi.