Central Young Lai Association chuan Mizoram atanga ei tur chi hrang hrang leh oil phurhluh thin chu kar khat chhung an khap tawh a, a tul anga la chhunzawm zel an tum.
Central YLA hruaitute sawi danin, Aizawl, Lunglei leh Hnahthial atanga Lawngtlai district kaltlanga Myanmar lama diesel leh petrol phurhluh tumte chu police bakah YLA-in chhun zan zawmin hmun hrang hrangah an la dang a. Petrol pump pali awmna, Lawngtlai bakah Sangau leh Bungtlang South-a filling station atanga Myanmar lama petrol leh diesel phurhluh khap a ni.
Burma lama to tak taka hralh tur petrol leh diesel phurhluh hi an khap chhung chuan a veng turin an duty dawn tih an sawi.
June 24 khan CYLA chuan Myanmar lama bungrua, a bikin petrol leh diesel phurhluh chu tiamchin awm loin an khap tih an puang tawh a. A hlawma petrol leh diesel tam tham tak taka phurh chhuah a nih avang hian mipui mimir leh Lawngtlai district-a hmasawnna hna thawktu contractor-ten harsatna an tawh phah nasa hle niin an sawi. Hei bakah hian Myanmar-a mipui rorelna din tura Chin pawl indinte chu hetiang eitur leh petrol leh diesel lo hmangtu Arakan hel pawlten an rap betin an kap thin a. CYLA-in ti tawh lo tura an tih hnu pawh an sim duh chuang lo tih an sawi a ni.
Kumin May 25 khan Myanmar-a bungrua, a bikin petrol leh diesel thawnluh hi CYLA chuan a lo khap tawh a. Arakan Army leh United League of Arakan nen an inbiak hnu-ah June 11 khan bungraw phurhluh khapna hi hlih a ni. Mahse, Arakan hel pawlte hian an intiamna tihlawhtling loin Chin state chhim lama Chin pawlte an la kah zui zel avangin June 24 atang khan bungraw lakluh hi khap a ni leh ta a ni. Lunglei district DCSO leh Siaha district bawrhsap pawhin petrol leh diesel man to zawka hralh leh tura lei khawl vak vak khapna hi an lo chhuah tawh a. Hei hi mipui leh hmasawnna hnathawktu company lianten harsatna an tawh nasat vang niin an sawi.
Burma-a oil phurhluh khap zel
Get real time updates directly on you device, subscribe now.