Burma sipai tlanchhia lam tur sipai thlawhna a chesual

Burma ram tualchhung buaina kaihhnawiha Mizorama Burma sawrkar sipai rawn tlanchhiate lam tura tirh, Burma sipai thlawhna chu Thawhlehni khan Lengpui Airport-ah a chesual a, mi 14 chuang zingah hliam 8 awmin, an zinga 2 hi an na deuh nia sawi a ni.
Thudawn danin, Burma sipai thlawhnaah hian pilot bakah thawktu dang 14 an chuang a, Thawhtanni khan Mizorama rawn tlanchhia Burma sawrkar sipai hi a rawn thiar tawh a ni. Thawhlehnia a rawn kal leh hi chawhma dar 10.19 ah tumin, runway-a a tlan lai mekin a kawi thut a, a chesual zui ta mai nia sawi a ni.
Hliamte hi Lengpui Primary Health Centre-a enkawl an ni a, ngaihtuahawm lutuk an awm lo nia sawi a ni.
Thlawhna chetsual avang hian Burma sipai tangkhang thawn haw tur a khaihlak phah mai a ni loa, Lengpui Airport-a domestic flight pangngai ho pawh an tum theih loh phah a, cancel, delay leh tumna hmun sawntir a nih phah tih thu dawn a ni.
Tarlan tawh angin, kumin January 18 khan Lawngtlai district-a Bandukbanga khuaah Burma sipai 276, an ralthuam nen an lo lut a. Home department atanga thudawn danin Myanmar sipai hi Arakan Army hel pawlin an awmna camp an laksak avangin January 17 khan Bandukbanga an rawn lut a, Assam Rifles-in an lo buaipui a ni. Aizawl Zokhawsanga Assam Rifles hmunah dahkhawm an ni a, Thawhtanni khan sipai 184 chu Burma ram Rakhine state-ah thlawhna hmang hian phurhluh an ni tawh a, an la lak loh mi 92 rawn lam tur hi tuna chesual hi a ni.
2023 November khan Burma sipai 104 chu Mizoramah sahimna zawnga rawn tlanlutin, Indian Air Force helicopter hmangin Manipur-a Moreh hmunah dah a, an rama hruai luh an lo ni tawh a. Kumin January 2 khan midang 151 chu Burma air force cargo hmangin Lengpui Airport atangin Sittwe-a dah an ni a, January 9 khan sipai 104 chu Lengpui atangin Sittwe-ah tho Burma sipai cargo thlawhna-in dah chhoh an ni tawh bawk.